წერეთლის გამზირის N93-ის ეზოში, ძველი ავტოფარეხების ნაცვლად, ახალი, გამწვანებული მოსასვენებელი სკვერი განთავსდება. ადგილობრივი მოსახლეობა დედაქალაქის მერის, კახა კალაძის ინიციატივას გამოეხმაურა და ავტოფარეხების დემონტაჟის გადაწყვეტილება მიიღო. აღნიშნულ საკითხთან დაკავშირებით, ადგილობრივ მოსახლეობას დღეს, დიდუბის რაიონის გამგებელი ირმა ზავრადაშვილი და რაიონის მაჟორიტარი დეპუტატი ვლადიმერ ძნელაძე შეხვდნენ. ირმა ზავრადაშვილმა მოსახლეობას ავტოფარეხების დემონტაჟში აქტიური მონაწილეობისთვის მადლობა გადაუხადა. მისი თქმით, გამგეობა მოსახლეობასთან ერთად სკვერის პროექტს შეადგენს, რომელშიც გათვალისწინებული იქნება თითოეული მცხოვრების მოსაზრება. “მოხარული ვარ, რომ წერეთლის გამზირის N93-ის მცხოვრებლები დედაქალაქის მერის გუშინდელ ინიციატივას გამოეხმაურნენ. დიდუბის რაიონის მაგალითი გადამდები იქნება და მათ სხვა ამხანაგობებიც მიბაძავენ. ყველა ამხანაგობის ასეთ გადაწყვეტილებას მაქსიმალურად დავუჭერთ მხარს. ვგეგმავთ, ასეთი ინიციატივის მქონე ამხანაგობები წავახალისოთ. ჩვენ ამ ადგილას გავაკეთებთ ძალიან ლამაზ სკვერს, რათა ის ბავშვებისა და დიდებისთვის სასურველ დასასვენებელ ადგილად იქცეს”, – განაცხადა ირმა ზავრადაშვილმა. მისივე თქმით, სკვერის მოწყობის გარდა, აღნიშნულ ტერიტორიაზე კედლების მოხატვაც იგეგმება.