იუსტიციის მინისტრის ინიციატივით, საქართველოს იმ სრულწლოვან მოქალაქეებს, რომლებიც ამჟამად ქაღალდის (ე.წ. ლამინირებულ) ძველ პირადობის მოწმობას ფლობენ და ამ დრომდე, მათ სახელზე საქართველოს მოქალაქის პირადობის ელექტრონული მოწმობა არასდროს გაცემულა, ერთი თვის განმავლობაში, 1 თებერვლიდან 1 მარტის ჩათვლით, შესაძლებლობა აქვთ, ისარგებლონ აქციით, ძველი დოკუმენტი ახლით შეცვალონ და პირადობის ელექტრონული მოწმობასრულიად უფასოდ მიიღონ, რომელიც თანამედროვე, გაუყალბებელი და ევროპული დოკუმენტია.

2012 წლის ბოლოს საქართველოში 3 087 163 მოქალაქე ქაღალდის პირადობის მოწმობას ფლობდა. დღეისათვის კი საქართველოში სულ მოქმედი 749 537 ე.წ. ლამინირებული პირადობის მოწმობაა. აქედან, ყველაზე მეტი ქაღალდის პირადობის მოწმობას თბილისში მცხოვრები მოქალაქეები ფლობენ - 175 914; შემდეგ მოდის იმერეთი 125 383; კახეთი - 80 007 და ქვემო ქართლი - 79 947.

იუსტიციის სამინისტროს ცნობით, აღნიშნული აქციით სარგებლობის მსურველ მოქალაქეებს შეუძლიათ, იუსტიციის სახლებს მიმართონ, სახელმწიფო სერვისების განვითარების სააგენტოს ტერიტორიულ სამსახურებს ან საზოგადოებრივ ცენტრებს. აქციის ფარგლებში, დოკუმენტის გაცემისას, მოქალაქეები როგორც პირადობის მოწმობის, ასევე, ფოტოსურათის გადაღების საფასურისგან გათავისუფლდებიან.

იუსტიციის სამინისტროში განმარტავენ, რომ ბიომეტრიული დოკუმენტის ქონა უზრუნველყოფს პრინციპს − „ერთი ამომრჩეველი − ერთი ხმა“, და არჩევნების დღეს საარჩევნო უბანზე ე.წ. კარუსელს გამორიცხავს.

დღეის მდგომარეობით, საარჩევნო უფლების მქონე 2 650 000-ზე მეტი საქართველოს მოქალაქე პირადობის ელექტრონულ მოწმობას ფლობს, ხოლო, დამატებით, 260 000-მდე პირი – საქართველოს მოქალაქის ბიომეტრიულ პასპორტს, რაც სერვისების განვითარების სააგენტოს ბაზებში 2 910 000-მდე ზუსტი და უტყუარი მონაცემის არსებობას ნიშნავს.