შრომის ბაზრის სტატისტიკის ახალი მეთოდოლოგია შრომის სტატისტიკოსთა მე-19 საერთაშორისო კონფერენციაზე „შრომითი საქმიანობის, დასაქმებისა და არასრულად გამოყენებელი სამუშაო ძალის სტატისტიკის შესახებ“ მიღებული რეზოლუციის მიხედვით, საკუთარი მოხმარებისთვის მომუშავე თვითდასაქმებული (პირველ რიგში, სოფლის მეურნეობის სფეროში) პირები დასაქმებულთა კატეგორიიდან გამოირიცხებიან. ინფორმაციას „საქსტატი“ ავრცელებს. 

მიმდინარე წლიდან საქსტატი შრომის საერთაშორისო ორგანიზაციის მხარდაჭერით იწყებს შრომის სტატისტიკოსთა მე-19 კონფერენციაზე მიღებული სტანდარტების დანერგვის პროცესს. აღნიშნული გულისხმობს ცვლილებების შეტანას სამუშაო ძალის გამოკვლევის კითხვარებში, მათ სრულმასშთაბიან  ტესტირებას და მიღებული შედეგების საფუძველზე სამუშაო ძალის გამოკვლევაში ახალი საერთაშორისო სტანდარტების და შესაბამისი ეროვნული თავისებურებების გათვალისწინებას.

საქსტატმა 2017 წლიდან სხვადასხვა ცვლილებები განახორციელა სამუშაო ძალის  გამოკვლევაში საერთაშორისო სტანდარტებით მიღებული მაჩვენებლების წარმოებისა და  არსებული მაჩვენებლების ხარისხის გასაუმჯობესებლად. საწყის ეტაპზე შინამეურნეობების ინტეგრირებულ გამოკვლევას გამოეყო სამუშაო ძალის მოდული და ჩამოყალიბდა დამოუკიდებელი, სრულმასშტაბიანი სამუშაო ძალის გამოკვლევა გაზრდილი შერჩევის ზომით და განახლებული კითხვარით და შერჩევის დიზაინით.

დღეს საქართველოს სტატისტიკის ეროვნული სამსახურის (საქსტატის) და შრომის საერთაშორისო ორგანიზაციის მიერ მოეწყო შეხვედრა დაინტერესებულ მხარეებთან შრომის ბაზრის სტატისტიკის ახალი საერთაშორისო სტანდარტების შესახებ. პრეზენტაცია აღნიშნულ საკითხებზე შრომის საერთაშორისო ორგანიზაციის (შსო) მთავარმა სტატისტიკოსმა კირან უოლშმა გააკეთა.