საქართველოს განათლების, მეცნიერების, კულტურისა და სპორტის მინისტრმა, მიხეილ ბატიაშვილმა საფრანგეთის საელჩოსა და განათლების საერთაშორისო ცენტრის ერთობლივი სამაგისტრო პროგრამის შედეგები შეაფასა, რომლის თქმით, „აღნიშნული პროგრამა უმაღლესი განათლების სისტემის ინტერნაციონალიზაციის პროცესისა და საგანმანათლებლო სფეროში ფრანგულ-ქართული თანამშრომლობის საუკეთესო პრეცედენტია.

საქართველოში განათლების ინტერნაციონალიზაციას რამდენიმე ფაქტორი განსაზღვრავს, ამ ფაქტორთა შორის, პროცესის წარმატებისთვის, მნიშვნელოვანია საერთაშორისო საგანმანათლებლო პროგრამები სტუდენტებისა და მკვლევრებისთვის, აკადემიური პერსონალის ინტერნაციონალიზაცია და ა.შ.

საფრანგეთი საგანმანათლებლო სფეროში საქართველოს ერთ-ერთი მთავარი პარტნიორია, ჩვენს თანამშრომლობას კიდევ უფრო გააღრმავებს 2018 წელს გაფორმებული ორმხრივი შეთანხმება, რომლის მიზანია ფრანგულ და ქართულ უნივერსიტეტებს შორის ორმაგი დიპლომების ამოქმედება ტურიზმის, სოფლის მეურნეობისა და ინფორმატიკის მიმართულებით.

ამ თანამშრომლობაში დიდი წვლილი შეაქვს სწორედ განათლების საერთაშორისო ცენტრისა და საფრანგეთის საელჩოს ერთობლივ სამაგისტრო პროგრამას, რომლის ფარგლებშიც 2016-2017 სასწავლო წლიდან საქართველოს მოქალაქეებს საშუალება აქვთ საფრანგეთში მიიღონ საერთაშორისოდ აღიარებული აკადემიური მაგისტრის ხარისხი როგორც ფრანგულენოვან, ასევე ინგლისურენოვან სამაგისტრო პროგრამებზე სწავლის შედეგად.

სამინისტრო სამომავლოდაც დაუჭერს მხარს განათლების საერთაშორისო ცენტრის საგანმანათლებლო პროგრამებს, ასევე მჭიდრო პარტნიორობის ფარგლებში გააგრძელებს თანამშრომლობას საფრანგეთთან’’ - განაცხადა მიხეილ ბატიაშვილმა.