გაეროს განვითარების პროგრამისა (UNDP) და საქართველოს რეგიონული განვითარებისა და ინფრასტრუქტურის სამინისტროს ორგანიზებით, დიდუბის საგამოფენო სივრცეში გამართულ ღონისძიებაზე საქართველოს განათლების, მეცნიერების, კულტურისა და სპორტის მინისტრის მოადგილემ, ირინა აბულაძემ მაღალ მთაში მოღვაწე ჭადრაკის მწვრთნელი, ჯემალ საღინაძე „მთის შვილის“ სტატუსით დააჯილდოვა.

„ბატონი ჯემალი ჭადრაკის სექციის გახსნის დღიდან, აგერ უკვე 25 წელზე მეტია მუშაობს მწვრთნელად მაღალ მთაში. ახლა უკვე სექციას ხელმძღვანელობს, როგორც ლიცენზირებული მწვრთნელი. რეგიონში ჭადრაკის პოპულარიზაციაში მისი წვლილი ძალიან დიდია. პროფესიით მათემატიკოსია და 34 წლის მანძილზე უწყვეტად არის რეგიონის ჩემპიონი. ბატონი ჯემალი წლის განმავლობაში 50-მდე მოსწავლეს ამზადებს და ახერხებს ყველას შეაყვაროს ჭადრაკი.

ჭადრაკი ხომ აზროვნების სტილია და არა მხოლოდ სპორტი და ძალიან მიხარია, რომ ბატონ ჯემალს აქ ერთად შეგვიძლია ვუთხრათ მადლობა,“ - აღნიშნა ირინა აბულაძემ.

ღონისძიების ფარგლებში, მთაში მცხოვრები სხვადასხვა პროფესიის ადამიანები „მთის შვილის“ სიმბოლური სტატუსით დაჯილდოვდნენ.

გაეროს გენერალურმა ასამბლეამ 2002 წელს საერთაშორისო საზოგადოებას 11 დეკემბერს მთის საერთაშორისო დღის აღნიშვნისკენ მოუწოდა, ეს დღე საქართველოში წელს პირველად აღინიშნა.