სტამბულთან ახლოს გემზე მიტოვებული ქართველი მეზღვაურებისთვის საკვებისა და წყლის მიწოდების საკითხს თურქეთში საქართველოს საკონსულო გააკონტროლებს.

ამის შესახებ „ნიუსპრესს“ თურქეთში საქართველოს კონსულმა ზურაბ პატარაძემ განუცხადა.

მისი თქმით, კომპანიის წარმომადგელნები დაპირდნენ, რომ მეზღვაურებისთვის სახელფასო დავალიანების დაფარვამდე ეკიპაჟის წევრებს საკვებს მიაწვდიან.

„მეზღვაურებს ჩვენთვის არ უთქვამთ, რომ საკვები და წყალი არ აქვთ. აღნიშნულ საკითხს დღესვე გადავამოწმებთ და კომპანიას მოვთხოვთ მეზღვაურების საკვებით უზრუნველყოფას“ - განაცხადა პატარაძემ.

მისივე ინფორმაციით, მეზღვაურების სახელფასო დავალიანების დასაფარად კომპანიის წარმომადგენლებს 10 დღიანი ვადა აქვთ მიცემული, რომელიც 3 აგვისტოს იწურება.

სტამბულთან ახლოს, ზეიპორტში გემზე მიტოვებული ქართველი მეზღვაურები კი, სახელფასო დავალიანების გასტუმრებას დღეს ელოდნენ, თუმცა, მათ ამ დრომდე არავინ დაკავშირებიათ.

როგორც „ნიუსპრესს“ ერთ-ერთმა მეზღვაურმა მამუკა ქოჩალიძემ განუცხადა, კომპანიის წარმომადგენლები ასევე დაპირდნენ, რომ ეკიპაჟის წევრებს დღეს საკვებს და წყალს მიაწვდიან.

„ტანკერზე მუშაობის დაწყების წინ კონტრაქტები გაგვიფორმეს და პირველი ორი თვე ხელფასიც გადაგვიხადეს. თუმცა, მესამე-მეოთხე თვეს აღარ მოუციათ და გვპირდებოდნენ, რომ უკრაინიდან დაბრუნებულებს თურქეთში ტვირთის ჩამოტანისთანავე მოგვცემდნენ გასამრჯელოს. ამის შემდეგ ხუთი თვე გავიდა და მეექვსე დაიწყო, რაც არავინ აღარ გამოჩენილა გემზე. მისი დატოვების უფლებაც არ გვაქვს, რადგან საბუთები კომპანიის წარმომადგენლებს აქვთ და თუ მათ არ დაგვიხურეს ვიზები, ხმელეთზე გადმოსვლასაც ვერ შევძლებთ“ - ყვება ქართველი მეზღვაური.

მამუკა ქოჩალიძის ინფორმაციით, გემზე ეკიპაჟის 10 წევრი იმყოფება, საიდანაც 6 საქართველოს მოქალაქეა, ხოლო ორი აზერბაიჯანის და ორიც თურქეთის, თუმცა, საქართველოს საელჩოს გარდა დანარჩენი მეზღვაურების ბედით არავინ დაინტერესებულა.

„კომპანიის საერთო დავალიანება 170 ათას აშშ დოლარს შეადგენს, აქედან ქართველი მეზღვაურებისთვის მათ მიერ გადასახდელი თანხა 70 ათასამადეა. აზერბაიჯანის მოქალაქეებსაც ჩვენი იმედი აქვთ, რომ კუთვნილი ხელფასი მიიღონ და სახლებში დაბრუნება შეძლონ“ - აღნიშნა მან.

რაც შეეხება მეზღვაურების ჯანმრთელობის მდგომარეობას, ქოჩალიძის თქმით, ისინი ძლიერი ნერვული სტრესის ქვეშ არიან.

სტამბულთან ახლოს, ზეიპორტში, ბერძნულ-ამერიკულ ფირმა „მეტმარის“ კუთვნილ ტანკერზე, რომელიც თურქებს იჯარით ჰქონდათ აღებული, უკვე სამი თვეა ეკიპაჟის 10 წევრი მიტოვებულია, მათ შორის არის 6 ქართველი მეზღვაური - ზვიად ბრუნჯაძე, რამინ გორგოშაძე, თემურ გოგროჭაძე, ჯემალ მგელაძე, მამუკა ქოჩალიძე და ვეფხია ცინცაძე.