სტამბულთან ახლოს, ზეიპორტში გემზე მიტოვებულ ქართველ მეზღვაურებს ხელფასების საკითხთან დაკავშირებით გემის მფლობელი კომპანიიდან  ჯერ არავინ დაკავშირებიათ.

როგორც „ნიუსპრესს“ გემზე მყოფმა ერთ-ერთმა მეზღვაურმა მამუკა ქოჩალიძემ განუცხადა, კომპანიის წარმომადგენლებს მათთვის დღეს ხეფასებიც უნდა მიეცათ და საქართველოში დასაბრუნებლად საბუთებიც. 

„ამ დრომდე არავინ არ შეგვხმიანებია. ცოტა ხნის წინ საქართველოს საელჩოში დავრეკეთ და იქ გვითხრეს, რომ მათ კომპანიას ვადა 3 აგვისტომდე მისცეს და თუ ამ დრომდე არ გამოჩნდებიან, დამატებით ზომებს მიიღებენ“ - აღნიშნა ქოჩალიძემ.

მისივე თქმით, კომპანიის წარმომადგენლებმა დაპირებისამებრ დღეს მეზღვაურებს წყალი და საკვებიც უნდა მიაწოდონ.

„ველოდებით, რომ საკვები და წყალი მაინც მოგვიტანონ“ - აღნიშნა ქართველმა მეზღვაურმა.

მისივე თქმით, დღესვე, მეზღვაურები გემზე კომპანიის მენეჯმენტის წარმომადგენლებთან ერთად, გემის ბერძენ მეპატრონესაც ელოდნენ.

„ტანკერზე მუშაობის დაწყების წინ კონტრაქტები გაგვიფორმეს და პირველი ორი თვე ხელფასიც გადაგვიხადეს. თუმცა, მესამე-მეოთხე თვეს აღარ მოუციათ და გვპირდებოდნენ, რომ უკრაინიდან დაბრუნებულებს თურქეთში ტვირთის ჩამოტანისთანავე მოგვცემდნენ გასამრჯელოს. ამის შემდეგ ხუთი თვე გავიდა და მეექვსე დაიწყო, რაც არავინ აღარ გამოჩენილა გემზე. მისი დატოვების უფლებაც არ გვაქვს, რადგან საბუთები კომპანიის წარმომადგენლებს აქვთ და თუ მათ არ დაგვიხურეს ვიზები, ხმელეთზე გადმოსვლასაც ვერ შევძლებთ“ - ყვება ქართველი მეზღვაური.

მამუკა ქოჩალიძის ინფორმაციით, გემზე ეკიპაჟის 10 წევრი იმყოფება, საიდანაც 6 საქართველოს მოქალაქეა, ხოლო ორი აზერბაიჯანის და ორიც თურქეთის, თუმცა, საქართველოს საელჩოს გარდა დანარჩენი მეზღვაურების ბედით არავინ დაინტერესებულა.

„კომპანიის საერთო დავალიანება 170 ათას აშშ დოლარს შეადგენს, აქედან, ქართველი მეზღვაურებისთვის მათ მიერ გადასახდელი თანხა 70 ათასამადეა. აზერბაიჯანის მოქალაქეებსაც ჩვენი იმედი აქვთ, რომ კუთვნილი ხელფასი მიიღონ და სახლებში დაბრუნება შეძლონ“ - აღნიშნა მან.

რაც შეეხება მეზღვაურების ჯანმრთელობის მდგომარეობას, ქოჩალიძის თქმით, ისინი ძლიერი ნერვული სტრესის ქვეშ არიან.

სტამბულთან ახლოს, ზეიპორტში, ბერძნულ-ამერიკულ ფირმა „მეტმარის“ კუთვნილ ტანკერზე, რომელიც თურქებს იჯარით ჰქონდათ აღებული, უკვე სამი თვეა ეკიპაჟის 10 წევრი მიტოვებულია, მათ შორის არის 6 ქართველი მეზღვაური - ზვიად ბრუნჯაძე, რამინ გორგოშაძე, თემურ გოგროჭაძე, ჯემალ მგელაძე, მამუკა ქოჩალიძე და ვეფხია ცინცაძე.