კოალიციაში „მედიის ადვოკატირებისთვის“ გაერთიანებული 13 ორგანიზაციის წარმომადგენლები მაუწყებლობის სავალდებულო ტრანზიტის - must carry-ის ეფექტიანად  წარმართვასა და განხორციელებას დააკვირდებიან. ამის შესახებ კოალიციის წარმომადგენლებმა დღეს სასტუმრო „თბილისი მარიოტში“ გამართულ დისკუსიაზე აღნიშნეს.
მათი თქმით, must carry პოზიტიური ნაბიჯია, რომელიც საქართველოში მედიაპლურალიზმის განვითარებას შეუწყობს ხელს და რომლის განხორციელებისთვის კოალიცია შესაბამის რეკომენდაციებს შეიმუშავებს.
როგორც დისკუსიაზე ტელეკომპანია „გლობალ ტვ“-ის განვითარების დირექტორმა ზურაბ ბაზლიძემ განაცხადა, მსგავსი შეხვედრები მისასალმებელია, რადგან სახელმწიფო და არასამთავრობო სექტორის წარმომადგენლები ერთმანეთს must carry-ს განხორციელებასთან დაკავშირებულ პრობლემებს აცნობენ.
მისი თქმით, აღნიშნული პროექტი რეალურად must carry არ არის, რადგან იგი კომუნიკაციებისა და მაუწყებლობის შესახებ კანონის ბაზაზე არ მიუღიათ.
„მოცემულ შემთხვევაში, იგი საარჩევნო კოდექსის ბაზაზეა მიღებული. სწორედ ამიტომაა ე.წ. must carry. ამ საკითხს მეტნაკლებად სკეპტიკურად ვუყურებ, რადგან რეგიონებში პატარ-პატარა საკაბელოები არსებობს, რომელთა აბონენტთა რაოდენობა 700 -1 200-ია, შესაბამისად, შედეგი ძალიან მიზერული იქნება“- განაცხადა ბაზლიძემ.
მისივე თქმით, ე.წ. must carry-ს ხარვეზები ვადებთან დაკავშირებითაც აქვს და ამიტომ ის წანასაარჩევნო ღონისძიებაა.
როგორც დისკუსიაზე კოალიცია „მედიის ადვოკატირებისთვის“ კოორდინატორმა თამარ კორძაიამ განაცხადა, კომუნიკაციების კომისიას საარჩევნო კოდექსის თანახმად, must carry-ს განხორციელების მონიტორინგის ვალდებულება აქვს.
„ჯერ კიდევ ბუნდოვანია როგორ განახორციელებს ამას კომუნიკაციების ეროვნული კომისია და ვისზე გავრცელდება მისი კონტროლის ფარგლები. ამაზე კომისიას საჯარო ადმინისტრაციული წარმოება უკვე დაწყებული აქვს, რომელშიც მონაწილეობა ნებისმიერ საჯარო პირს შეუძლია“- განაცხადა კორძაიამ.
კოალიციამ „მედიის ადვოკატირებისთვის“ წინასაარჩევო პერიოდში სატელევიზიო მედიის რეგულირების შესახებ დღეს დისკუსია გამართა. შეხვედრაზე must carry-ს განხორციელების პერსპექტივები და არსებული გამოწვევები განიხილეს.
დისკუსიას საკაბელო ოპერატორების, მედიის, არასამთავრობო ორგანიზაციებისა და კომუნიკაციების ეროვნული კომისიის წარმომადგენლები ესწრებოდნენ.