პოლიტოლოგმა და პუბლიცისტმა გიგა ლიპარტელიანმა კოალიცია „ქართული ოცნების“ ლიდერზე ბიძინა ივანიშვილზე წიგნი - „სიმართლე, რომელიც  ქართველმა ხალხმა უნდა იცოდეს“ გამოსცა.

ლიპარტელიანის შეფასებით, ბიძინა ივანიშვილი „დამზადებულია რუსეთში საბჭოთა კავშირის რეცეპტით“.

როგორც ლიპარტელიანმა დღეს გამართულ პრესკონფერენციაზე აღნიშნა, ივანიშვილზე წინგის დაწერა მას შემდეგ გადაწყვიტა, რაც მისი პოლიტიკური ამბიციების შესახებ გაიგო.

მისი თქმით, წიგნში აღწერილია ივანიშვილის დანაშაულებრივი სამქიანობა და ამის კონკრეტული ფაქტები.

„1994 წელს ქართველი კანონიერი ქურდის ოთარ კვანტრიშვილის მკვლელობა პირდაპირ კავშირშია ბიძინა ივანიშვილის ბიზნეს და საბანკო მოღვაწეობასთან. მე, ამ წიგნის დაწერას არ გადავწყვეტდი, რომ მას ფულით ათასობით ადამიანი არ გაესულელებინა. ჩემი მიზანია ქართველმა ხალხმა ივანიშვილზე სრული სიმართლე იცოდეს“ - აღნიშნა ლიპარტელიანმა.

მისი მტკიცებით, „ქართული ოცნების“ ლიდერზე წიგნის გამოცემა არცერთი პოლიტიკური ძალის დაკვეთით არ მომხადარა.

„იმ შემთხვევაში თუ, ვინმე დამაბრალებს, რომ ივანიშვილზე წიგნი ვინმეს დაკვეთით დავწერე, მას სასამართლოში მოუწევს ცილისწამებაზე პასუხისგება“ - აცხადებს პოლიტოლოგი.

ამასთან, ლიპარტელიანმა პრეზიდენტ მიხეილ სააკაშვილს მიმართა და კანონის მიღება მოითხოვა, რომელიც რუსეთიდან ფულის შემოსვლას შეეხება.

„პარლამენტმა უნდა მიიღოს კანონი, რომლის მიხედვითაც ის არასამთავრობო ორგანიზაციები და პოლიტიკური პარტიები, რომლებიც დაფინანსებას რუსეთიდან მიიღებენ დაჯარიმდნენ და საქმიანობა საერთოდ აეკრძალოთ“ - მიაჩნია ლიპარტელიანს.

მისივე თქმით, მსოფლიოს რუკაზე ვერავინ იპოვის სახელმწიფოს, სადაც პოლიტიკური ძალები ოკუპანტი ქვეყნიდან შემოსული ფულით ფინანსდებიან.

ამასთან, ლიპარტელიანი ოქტომბრის საპარლამენტო არჩევნებზე ბიძინა ივანიშვილზე დოკუმენტური ფილმის გადაღებას გეგმავს, რომლის სახელწოდებაც იქნება - “დამზადებულია რუსეთში საბჭოთა კავშირის რეცეპტით“.