სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ სამების საკათედრო ტაძარში საკვირაო  წირვის დასრულების შემდეგ ქადაგებისას მოახლოებულ საპარლამენტო არჩევნებზე ისაუბრა.
უწმინდესის თქმით, საპარლამენტო არჩევნების გამო არ შეიძლება ადამიანებმა ერთმანეთს შეურაცხყოფა მიაყენონ.
„მოახლოებულია პარლამენტის არჩევნები და მინდა გთხოვოთ, კამათის თუ საუბრის დროს ნუ მიაყენებთ ერთმანეთს შეურაცხყოფას. იქონიეთ მოთმინება, კეთილი გული, სიბრძნე. ისეთი სიტყვა არ უნდა თქვათ, რომლისაც შემდეგ თვითონვე შეგრცხვებათ“- ბრძანა პატრიარქმა.
დღეს, უწმინდესმა ხევსურეთში მოღვაწე მღვდელი იოსებ გაჩვა დეკანოზის ხარისხში აიყვანა და დამშვენებული ჯვრის ტარების უფლებით დააჯილდოვა.
პატრიარქის თქმით, 2 აგვისტოს ილიაობაა - წმინდა ილია წინასწარმეტყველის და წმინდა ილია მართლის დღესასწაული, შესაბამისად, 1 აგვისტოს 18:00 საათზე სამების საკეთადრო ტაძარში ლოცვა აღევლინება, ხოლო 2 აგვისტოს 09:00 საათზე საზეიმო წირვა ჩატარდება.
დღესვე, უწმიდესმა რამდენიმე ქართული გვარიც დალოცა.