განათლების, მეცნიერების, კულტურისა და სპორტის მინისტრმა, მიხეილ ბატიაშილმა და იტალიის რესპუბლიკის საგანგებო და სრულუფლებიანმა ელჩმა საქართველოში, ანტონიო ენრიკო ბარტოლიმ ახალი პროგრამა „იტალიური, როგორც მეორე ენა“ წარადგინეს.

2018-2019 სასწავლო წლიდან, სურვილის შემთხვევაში, მოსწავლეები იტალიურს, როგორც მეორე უცხოურ ენას, ისწავლიან. მათ ამის შესაძლებლობა საქართველოს განათლების, მეცნიერების, კულტურისა და სპორტის სამინისტროსა და იტალიის რესპუბლიკის საგარეო საქმეთა სამინისტროს შორის ზოგადი განათლების სფეროში თანამშრომლობის შესახებ შეთანხმების მემორანდუმის საფუძველზე მიეცათ.

განათლების სამინისტროს პრესსამსახურის ცნობით, მემორანდუმის თანხმად, მხარეები ერთობლივი პროექტებისა და ინიციატივების განხორციელებას იმ ზოგადსაგანმანათლებლო დაწესებულებებში უწყობენ ხელს, რომლებიც იტალიური ენის სწავლებით და სწავლების იტალიურ ენაზე წარმართვით არიან დაინტერესებულნი.

იტალიის საელჩოს ძალისხმევით და სამინისტროს მხარდაჭერით, შეიქმნა იტალიურის, როგორც მეორე ენის სტანდარტი/პროგრამა და შესაბამისად, უკვე დაიწყო იტალიური ენის სწავლება თბილისის 20 სკოლაში, მათ შორის, 13 საჯაროსა 7 კერძო სკოლაში. იტალიის მხარემ ეს სკოლები სახელმძღვანელოებით უზრუნველყო, იტალიური მხარის ძალისხმევით პედაგოგები გადამზადდნენ და მათი სახელფასო ფონდისთვის დამატებითი თანხები გამოიყო.

მინისტრმა ევროპული ენების სწავლების გაძლიერების მნიშვნელობასა და იტალიის რესპუბლიკასთან მჭიდრო თანამშრომლობის სამომავლო პერპექტივებზე ისაუბრა. მისი თქმით, ენების შესწავლა არა მხოლოდ საკომუნიკაციო კომპეტენციების შეძენაა, არამედ ეს უზრუნველყოფს ქვეყნის კულტურისა და ცივილიზაციის გაცნობას, ხალხთა დამეგობრებას და ურთიერთობების განვითარებას.

ელჩმა ურთიერთთანამშრომლობისა და კერძოდ, იტალიური ენის პოპულარიზაციისკენ გადადგმული ნაბიჯების მნიშვნელობას ხაზი გაუსვა და ყველა იმ ადამიანის მიმართ მადლიერება გამოხატა, ვინც ქართულ საგანმანათლებლო სივრცეში იტალიური ენის დამკვიდრებას უწყობს ხელს.