თბილისის საბავშვო ბაგა-ბაღის მართვის სააგენტო თბილისის N15 ბაგა-ბაღის მიმართ ოპოზიციის „ძალა ერთობაშა“ მიერ გამოთქმულ ბრალდებებთან დაკავშირებით განცხადებას ავრცელებს.

აღნიშნულ განცხადებას უცვლელად გთავაზობთ.


„გვსურს გამოვეხმაუროთ გაერთიანებული ოპოზიციის - „ძალა ერთობაშია“ წარმომადგენლების მიერ თბილისის N15 ბაგა-ბაღის დირექტორის მიმართ გამოთქმულ ბრალდებებს ძალადობის ფაქტთან დაკავშირებით.

განვმარტავთ, რომ აღნიშნული ბაღის დირექტორი მიმდინარე კვირაში კუთვნილი შვებულებით სარგებლობს და სამსახურებრივ მოვალეობას არ ასრულებს. იმის გათვალისწინებით, რომ ოპოზიციურმა პარტიამ სამართალდამცავ ორგანოებს უკვე მიმართა და ფაქტის მოკვლევა დაწყებულია, სააგენტო ამ უწყების დასკვნას დაელოდება და სწორედ ამის საფუძველზე მოხდება შესაბამისი რეაგირება.

აქვე, აუცილებლად მიგვაჩნია საზოგადოებას მივაწოდოთ ინფორმაცია იმის შესახებ, რომ ოპოზიციური პარტიის წარმომადგენლებს, რომლებიც ბაღების მართვის სააგენტოში პოლიტიკური მოთხოვნებითა და დესტრუქციული ქმედებებით მოვიდნენ, სააგენტოს ხელმძღვანელი, კახაბერ გვანცელაძე მოადგილეებთან ერთად შეხვდა და საქმის ვითარება პირადად განუმარტა“ - ნათქვამია განცხადებაში.