თბილისის ღამის ეკონომიკის განვითარების პროექტის ფარგლებში დანიშნულმა „ღამის ავტობუსმა“ პირველი რეისი შეასრულა. №222 ავტობუსი ყოველ პარასკევსა და შაბათ ღამეს, 00:00-დან 06:00 საათამდე, მეტროსადგურ „ახმეტელის თეატრიდან“ „ვარკეთილამდე“ იმოძრავებს.

„ღამის ავტობუსის“ პირველ მგზავრებს გამომცემლობა „ინტელექტმა“ სასიამოვნო სურპრიზიმოუმზადა. მათ ავტობუსში ქართველი და უცხოელი ავტორების წიგნები დახვდათ.

ღამის ეკონომიკის განვითარების პროექტის ხელმძღვანელმა, სერგი გვარჯალაძემ გამომცემლობა „ინტელექტს“ მხარდაჭერისთვის მადლობა გადაუხადა. მისი თქმით,პირველ ეტაპზე პროექტი საპილოტეა დამოთხოვნაზე დაკვირვების შედეგად მარშრუტების კორექცია შესაძლებელი იქნება.

„ღამის ავტობუსის“ საპილოტე პროექტი დედაქალაქის უმეტეს ნაწილს მოიცავს და მგზავრებს გასართობი და კულტურული აქტივობებით დატვირთულ ცენტრებთან აკავშირებს.

ღამის ავტობუსი მოძრაობას მეტროსადგურ „ახმეტელიდან“ დაიწყებს და პირველი გაჩერება დიდ დიღომში, სუპერმარკეტ „გუდვილთან“ ექნება. შემდეგ გაივლის აღმაშენებლის ხეივანს, მარშალ გელოვანის გამზირს, მტკვრის მარჯვენა სანაპიროსა და სააკაძის I გასასვლელთან გაჩერდება. შემდეგ, „ღამის ავტობუსი“ ვახუშტის ხიდს გადაკვეთს და მგზავრებს ვახუშტის ქუჩაზე და სტადიონ „დინამო არენასთან“ მიიყვანს, საიდანაც გზას აღმაშენებლის გამზირზე განაგრძობს და მეტროსადგურ „მარჯანიშვილის“ მიმდებარედ გაჩერდება. ამის შემდეგ, იგი გაივლის მარჯანიშვილისა და ჯავახიშვილის (ყოფ. ელბაქიძის დაღმართი) ქუჩებს და მგზავრებს ჯერ პირველი რესპუბლიკის მოედანზე გაუჩერებს, ხოლო შემდეგ - თავისუფლების მოედანსა და ბარათაშვილის ქუჩაზე - „კონკასთან“. ავტობუსი გადაკვეთს ბარათაშვილის ხიდს და მგზავრებს ევროპის მოედანზე მიიყვანს. იგი გზას გორგასალისა და გულუას ქუჩებისკენ განაგრძობს და აბანოებთან გაჩერდება. ორთაჭალის გავლის შემდგომ, ავტობუსს მორიგი გაჩერებები ექნება დოდაშვილის მოედანსა და მეტრო „ისანთან“. ავტობუსი კახეთის გზატკეცილით ჯავახეთის ქუჩას დაუკავშირდება და მოძრაობას მეტრო „ვარკეთილთან“ დაასრულებს.

საპილოტე მარშრუტზე „მანის“ მარკის ავტობუსი ერთსაათიანი ინტერვალით და სტანდარტული - 50-თეთრიანი ტარიფით მოძრაობს. ამასთანავე, მოქმედებს შეღავათიანი მგზავრობის ტარიფიც.

ღამის ავტობუსს შემდეგი გაჩერებები აქვს:

• მეტროსადგური „ახმეტელის თეატრი“;
• ფარნავაზ მეფის გამზირი (ჰიპერმარკეტი „გუდვილი“);
• მტკვრის მარჯვენა სანაპიროს და გიორგი სააკაძის I გასასვლელის გადაკვეთა;
• ვახუშტი ბაგრატიონისა და რაფაელ აგლაძის ქუჩების გადაკვეთა;
• სტადიონი „დინამო არენა“;
• დავით აღმაშენებლის გამზირი #106;
• პირველი რესპუბლიკის მოედანი;
• მეტროსადგური „თავისუფლების მოედანი“;
• ნიკოლოზ ბარათაშვილის ქ. „კონკა“;
• ევროპის მოედანი;
• ვახტანგ გორგასალის ქ. #7 - აბანოებთან;
• დოდაშვილის მოედანი;
• მეტროსადგური „ისანი“;
• მეტროსადგური „ვარკეთილი“.