სახელმწიფო რწმუნებული სამეგრელო-ზემო სვანეთის რეგიონში ალექსანდრე მოწერელია სურსათის ეროვნული სააგენტოს უფროსის მოადგილესთან გიორგი იაკობაშვილთან და საკოორდინაციო შტაბის წევრებთან ერთად სიმინდის მოსავლის აღების პროცესს გაეცნო.

აბაშის მუნიციპალიტეტში სიმინდის საყანე ფართობებში მოსავლის აღება მიმდინარეობს.

როგორც ფერმერები აცხადებენ, ასეთი კარგი მოსავალი მრავალი წელია არ მიუღიათ.

„ეს არის გატარებული ღონისძიებების ეფექტიანობის კიდევ ერთი მაგალითი. როგორც მოსახლეობა აღნიშნავს და ჩვენც ვხედავთ, მოსავალი კარგია, დაზიანება არ აღენიშნება. რა თქმა უნდა, ყველგან ანალოგიური შედეგი არ არის, თუმცა, ეს მაგალითი, რაც დღეს ვიხილეთ, არის იმის წინაპირობა, რომ ჩვენ გვექნება წარმატებები ყველგან, სადაც ერთიანი ძალისხმევით სწორად გატარდება ღონისძიებები,“ - განაცხადა ალექსანდრე მოწერელიამ.

ეგრეთ წოდებულ ანჯელის მასივში სიმინდის ნათესები დაახლოებით 6500 ჰექტარ ფართობზეა გაშენებული. აზიურ ფაროსანასთან ბრძოლის მიზნით, სურსათის ეროვნულმა სააგენტომ დიდი მასივები, იქ სადაც შესაძლებელი იყო სპეციალიზებული ტექნიკის გამოყენება, ცივი შესხურების ტექნოლოგიით დაამუშავა.

„მავნებლის საწინააღმდეგო ღონისძიებები სახელმწიფო სტრატეგიის შესაბამისად მიმდინარეობს, რის შედეგადაც გვაქვს ხელშესახები შედეგი - მინიმუმამდე შემცირდა მავნებლის მიერ მოსავლის დაზიანება და ეკონომიკური ზარალი. სახელმწიფო აგრძელებს მავნებლის საწინააღმდეგო ღონისძიებებს და ამ პროცესში მნიშვნელოვანია მოსახლეობის ჩართულობა,“ - განაცხადა გიორგი იაკობაშვილმა.

ამ დროისთვის სახელმწიფოს მიერ თერმული ნისლის ტექნილოგიით და ცივი შესხურებით დამუშავებულია 573 ათასი ჰექტარი ფართობი სამეგრელოს, გურიის, აჭარისა და იმერეთის რეგიონებში. შედეგად დასავლეთ საქართველოში მავნებლის რაოდენობა შემცირდა, გავრცელების გეოგრაფიული არეალი კი არ გაზრდილა და კვლავაც ძველ საზღვრებში ფიქსირდება.

სამეგრელო-ზემო სვანეთის გუბერნატორი სურსათის ეროვნული სააგენტოს წარმომადგენლებთან ერთად სოფელ ტყვირის მოსახლეობას შეხვდა და საკარმიდამო ნაკვეთებში მავნებლის საწინააღმდეგო მექანიკური ღონისძიებების მიმდინარეობასაც გაეცნო. მან ხაზგასმით აღნიშნა, რომ მოსახლეობასთან აქტიური კომუნიკაცია პრიორიტეტულია.