საბერძნეთში ხანძრის შედეგად გარდაცვლილ და დაშავებულ ადამიანებს შორის საქართველოს მოქალაქეები არ არიან.
ამის შესახებ ინფორმაციას საბერძნეთში საქართველოს ელჩი, იოსებ ნანობაშვილი ადასტურებს.
მისი თქმით, დილის მონაცემებით, საქართველოს საელჩოში სამი მოქალაქის ზარი შევიდა, რომელთაც დახმარება უკვე გაეწიათ.
„გუშინ საღამოდან საქართველოს საელჩო საგანგებო რეჟიმში მუშაობს. ვიღებთ მოქალაქეების ზარებს ცხელ ხაზზე. საბედნიეროდ, ასეთი შეტყობინება იყო მხოლოდ სამი. სამივეს გაეწია შესაბამისი დახმარება ერთი გამოყვანილი იქნა ხანძრის ზონიდან.
კავშირზე ვართ შინაგან საქმეთა სამინისტროსთან.
საქართველოს არცერთი მოქალაქე არაა გარდაცვლილი და ჰოსპიტალიზირებული. ვაგრძელებთ სიტუაციის მონიტორინგს. ხანძრის კერები შედარებით ლოკალიზებულია. იმედია, კრიზისი მალე დამთავრდება“- განაცხადა ნანობაშვილმა ტელეკომპანია „იმედთან“ სატელეფონო საუბრისას.
საბერძნეთში ტყის ხანძარს 50-მდე ადამიანი ემსხვერპლა, 100-ზე მეტი კი დაშავდა. ათენთან ახლოს მდებარე ატიკის რეგიონში საგანგებო მდგომარეობა გამოცხადდა. ხანძარმა უკვე გაანადგურა რამდენიმე ათეული საცხოვრებელი სახლი.