თბილისის ზაქარია ფალიაშვილის სახელობის ოპერისა და ბალეტის სახელმწიფო აკადემიური თეატრის რეკონსტრუქცია „ასოციაცია ატუს“ 55 მლნ ლარი უჯდება.

როგორც „ნიუსპრესს“ „ატუს“ გენერალურმა დირექტორმა კარლო ლეკვეიშვილმა განუცხადა, სარემონტო სამუშაოები კვლავ გრძელდება და პირველი ივნისის მონაცემებით 10 134 177 ლარია დახარჯული.
„ეკონომიკური განვითარების სამინისტროს თხოვნით, ოპერის რეაბილიტაცია 2009 წელს დავიწყეთ. ამ დროისთვის, უკვე 11 მილიონ ლარამდეა დახარჯული. მთლიანად სარემონტო, სარეკონსტრუქციო და სარეაბილიტაციო სამუშაობის სავარაუდო ღირებულება 55 მილიონ ლარს შეადგენს“ - აღნიშნა მან.
ლეკვეიშვილის ინფორმაციით, ოპერის შენობის რეაბილიტაციის გარდა, კომპანია მისი ადმინისტრაციისა და სახელოსნოებისთვის 8 ათას კვ.მ. ფართის ახალ შენობასაც აშენებს.
„იქ, სადაც ადრე ადმინისტრაცია იჯდა, მცირე დარბაზი იქნება“ - აღნიშნა ლეკვეიშვილმა და დასძინა, რომ ოპერის თეატრზე ქართველი და უცხოელი არქიტექტორების ჯგუფი მუშაობს.
„ატუს“ ხელმძღვანელის განმარტებითვე, ამ დრომდე მათთვის სამუშაოების შეჩერების მოთხოვნით არავის მიუმართავს.
„რა თქმა უნდა, სახელმწიფოს აქვს უფლება მოითხოვის სარეაბილიტაციო სამუშაოების შეჩერება, თუმცა, ამის შესახებ ჩვენთვის არავის მოუმართავს“ - განაცხადა ლეკვეიშვილმა.
მისი ინფორმაციით, მათი ქვემოიჯარე კომპანიები „ბურჯი“ და „ელიტა ბურჯი“ დააყადაღეს, მათი ჩანაცვლების საკითხი დღის წესრიგში უკვე დგას.
ამასთან, ლეკვეიშვილის განმატრებით, „ატუ“ არის საქველმოქმედო ორგანიზაცია, რომელიც მხოლოდ სახელმწიფოს თხოვნის სააფუძველზე სოციალური, კულტურული, საგანმანათლებლო და სხვა სახის ობიექტების რეაბილიტაციას და მშენებლობას ახორციელებს. აღნიშნული პროექტები საერთაშორისო საქველმოქმედო ფონდი „ქართუს“ მიერ გამოყოფილი გრანტებით ფინანსდება.
კულტურისა და ძეგლთა დაცვის მინისტრის ნიკოლოზ რურუას განცხადებით, თბილისის ზაქარია ფალიაშვილის სახელობის ოპერისა და ბალეტის სახელმწიფო აკადემიური თეატრის რეკონსტრუქცია, რომელსაც კოალიცია „ქართული ოცნების“ ლიდერის ბიძინა ივანიშვილის ერთ-ერთი სამშენებლო კომპანია ახორციელებდა, შეწყდება და შესაბამისად, რეაბილიტაციას სახელმწიფო დაასრულებს.
„მიმაჩნდა და დღესაც მიმაჩნია, რომ ბალეტი და ოპერა პოლიტიკური ანგარიშსწორების მიღმა იდგა, მაგრამ თუ ეს ასე არაა, ოპერისა და ბალეტის თეატრს საქართველოს მთავრობა გააკეთებს ისევე, როგორც ბათუმისა და ქუთაისის ოპერები გააკეთა“ - განაცხადა რურუამ.

მინისტრის თქმით, რეკონსტრუქცია 2013 წელს უნდა დასრულებულიყო და ეს ვადა არ შეიცვლება.