სახელმწიფო სერვისების განვითარების სააგენტოს ინფორმაციით, 2012 წლის 6 თვის განმავლობაში, 245 809 ID ბარათი გაიცა, აქედან 20 000-მდე სტუდენტური ბარათია.
ID ბარათების გაცემის 6 თვის სტატისტიკა რუსთავის იუსტიციის სახლში, დღეს სახელმწიფო სერვისების განვითარების სააგენტოს თავმჯდომარემ გიორგი გაბრიელაშვილმა წარადგინა.
იუსტიციის სამინისტროში აცხადებენ, რომ ID ბარათი მაღალტექნოლოგიური, გაყალბებისგან დაცული პირადობის დამადასტურებელი დოკუმენტია, რომელიც უფასოდ გაიცემა სოციალურად დაუცველი ოჯახების წევრებზე, სტუდენტებზე, მეორე მსოფლიო ომის მონაწილეებზე და სხვა კატეგორიის მოქალაქეებზე.
იუსტიციის სამინისტროს ცნობით, ID ბარათი სპეციალურად სტუდენტებისთვისაცაა განკუთვნილი. მასზე განთავსებულია ინფორმაცია სტუდენტის შესახებ, რისი საშუალებითაც სტუდენტებს შესაძლებლობა აქვთ სხვადასხვა დაწესებულებაში ფასდაკლებებით ისარგებლონ.
თუ სტუდენტი პირველად იღებს ბარათს, მასზე დოკუმენტი განაცხადის წარდგენიდან მე-10 სამუშაო დღეს უფასოდ გაიცემა.
იმ შემთხვევაში, თუ სტუდენტს უკვე აქვს ID ბარათი, იგი მიმართავს იუსტიციის სახლებსა და სახელმწიფო სერვისების განვითარების სააგენტოს შესაბამის ტერიტორიულ სამსახურს ბარათით, რომელზეც სტუდენტის ინფორმაცია დაიტანება. ინფორმაცია ბარათზე განცხადების შეტანიდან შვიდი დღის ვადაში უფასოდ განთავსდება. ამ შემთხვევაში, სტუდენტის ID ბარათის გარეკანზე ვიზუალურად დატანილი იქნება სიტყვა „სტუდენტი“.