თბილისის საკრებულოს წევრის ლევან დავითაშვილისა და პარლამენტის წევრის, ირაკლი აბუსერიძის ინიციატივით, უანგარო დონორთა აქცია, "გაიღე სისხლი გაუზიარე სიცოცხლე სხვას" ჩატარდა. აქცია დეპუტატების სამაჟორიტარო ბიუროში გაიმართა, სადაც ბიუროს თანამშრომლებმა და ადგილობრივმა მოსახლეობამ უანგაროდ გაიღეს სისხლი, რათა გადაარჩინონ სხვისი სიცოცხლე. აქცია მიზნად ისახავს იმ ადამიანების დახმარებას, ვისაც ეს ყველაზე მეტად სჭირდება. დონაციის აქციის ჩატარება უზრუნველყო საქართველოში ერთ-ერთმა წამყვანმა სისხლის ბანკმა, რომელიც 2007 წელს მ. იაშვილის სახელობის ბავშვთა ცენტრალური საავადმყოფოს ბაზაზე შეიქმნა.
"დღეს ძალიან მნიშვნელოვანი აქცია ჩატარდა სახელწოდებით "გაიღე სისხლი, გაუზიარე სიცოცხლე სხვას." საქველმოქმედო აქციის მიზანია უანგარო დონაციის პოპულარიზაცია. სისხლი მუდმივად სჭირდებათ უმძიმეს პაციენტებს, მათ შორის ბავშვებს. სხვადასხვა ჯგუფის სისხლი სამაჟორიტარო ბიუროს თანამშრომლებმა და ადგილობრივმა მაცხოვრებლებმა უანგაროდ გაიღეს. გაღებული სისხლით იაშვილის კლინიკაში ლეიკემიით დაავადებულ ბავშებს დაეხმარებიან. მსგავსი აქციების ჩატარება მომავალშიც იგეგმება"- განაცხადა ლევან დავითაშვილმა.

როგორც მედიკოსებმა აღნიშნეს, სისხლის ჩაბარება ყველა ჯანმრთელ, ზრდასრულ ადამიანს შეუძლია საკუთარი ჯანმრთელობისთვის სრულიად უსაფრთხოდ. დეპუტატების განცხადებით, საქართველოში უანგარო დონორობის დამკვიდრება მნიშვნელოვანია და მსგავსი აქციები პერმანენტულ ხასიათს უნდა იღებდეს.