არასამთავრობო ორგანიზაცია „სოლიდარობა მედიის თავისუფლებისთვის“ პროკურატურის მხრიდან ტელეკომპანია  „მაესტროს“ მიმართ განხორციელებულ ქმედებებს აპროტესტებს.
აღნიშნულთან დაკავშირებით ორგანიზაცია განცხადებას ავრცელებს და ქართულ და საერთაშორისო საზოგადოებას მედიის შევიწროების ფაქტებზე რეაგირებისკენ მოუწოდებს.
ორგანიზაციაში განმარტავენ, რომ ტელეკომპანია „მაესტრომ“, როგორც მედიასფეროში მომუშავე ბიზნეს სუბიექტმა, საკუთარი ინიციატივითა და რისკების გათვალისწინებით, გადაწყვიტა პიარ-კამპანიის „მაესტრო ყველა ოჯახში" ჩატარება, რომლის მიზანი აუდიტორიის რიცხოვნული და გეოგრაფიული ზრდა იყო.
„მიუხედავად იმისა, რომ „მაესტროს“ აღნიშნული კამპანია მიმართული იყო იმისკენ, რომ ბიზნეს-სუბიექტს კიდევ უფრო განემტკიცებინა მედია-ბაზარზე საკუთარი პოზიციები, რაც ნებისმიერი საწარმოსთვის ბუნებრივი და ლოგიკურია, მთავარმა პროკურატურამ სრულიად უსაფუძვლოდ და ტენდენციურად აღნიშნული ქმედება შეაფასა, როგორც „სატელევიზიო ანტენების უსასყიდლოდ გადაცემით ამომრჩეველთა მოსყიდვის ფაქტი“, რასაც „მაესტროს“ ტექნიკური საშუალებების დაყადაღების შესახებ სასამართლოს ოპერატიული გადაწყვეტილება მოჰყვა“ - აცხადებენ ორგანიზაციაში და აღნიშნავენ, რომ პროკურატურამ კიდევ ერთხელ, სრულიად ცინიკურად, უკანონო ქმედების საფუძვლად „წინაასარჩევნო პროცესების დაცვა შესაძლო დანაშაულებრივი ჩარევისგან, პოლიტიკური პარტიებისა და მოქალაქეების საარჩევნო უფლებებისა და გამოხატვის თავისუფლების უზრუნველყოფა“ დაასახელა.
„სოლიდარობა მედიის თავისუფლებისათვის“ აცხადებს, რომ აღნიშნული ქმედებით პროკურატურამ და სასამართლომ ერთის მხრივ, ტელეკომპანია „მაესტროს“, როგორც მედია-სუბიექტის თავისუფლება შეზღუდეს, ხოლო მეორეს მხრივ, შეიზღუდა ეროვნული და საერთაშორისო სამართლით განმტკიცებული „ინფორმაციის თავისუფლად მიღებისა და გავრცელების უფლება“.
„მოვუწოდებთ ქართულ და საერთაშორისო საზოგადოებას ერთობლივი, კონსოლიდირებული ძალებით წინ აღუდგეთ თავისუფალი მედიის შევიწროების ფაქტებსა და ყოველმხრივ შევუწყოთ ხელი თავისუფალი და კონკურენტული არჩევნების ჩატარებას“- აცხადებენ ორგანიზაციაში.
თბილისის საქალაქო სასამართლომ მთავარი პროკურატურის მიმართვის საფუძველზე, ტელეკომპანია „მაესტროს“ სატელიტური ანტენები 11 ივლისს დააყადაღა.