ტელეკომპანია „რუსთავი 2“-ის შენობასთან დღეს დაგეგმილ რუის-ურბნისის მიტროპოლიტის, მეუფე იობისადმი სოლიდარობის აქციაზე  მხოლოდ რამდენიმე სასულიერო პირი მივიდა.

ტელეკომპანიის შენობათან სამების საკათედრო ტაძრის დიაკონმა ელიზბარ დიაკონიძემ ჟურნალისტებთან საუბრისას განაცხადა, რომ ის „რუსთავი 2“-თან აქციაზე მეუფე იობის მხარდასაჭერად გამოცხადდა. 

მისი თქმით, დაუსჯელობის სინდრომმა წმინდა სინოდს წელს ახალი გადაწყვეტლება მიაღებინა - დაიგმო მეუფე იობის მიბრძანება პოლიტიკური კოალიცია „ქართული ოცნების“ მხარდასაჭერად მცხეთაში გამართულ აქციაზე.

მისივე განმარტებით, ეკლესია გვასწავლის, რომ მეუფე, მღვდელი და ბერი იქ უნდა იდგეს, სადაც ხალხია.

„უნდა დაინგრეს სტერეოტიპი, რომ სასულიერო პირებს საპროტესტო აქციებზე სიარული ეკრძალებათ. აქ დასაგმობი არაფერია“ - აღნიშნა სამების ტაძრის დიაკონმა.

სოლიდარობის აქციაში მონაწილეობის მისაღებად, „რუსთავი 2“-თან საგურამოს ილია მართლის მონასტრის დეკანოზი ტარიელიც მივიდა. როგორც მან აღნიშნა, ის წმინდა სინოდის გადაწყვეტილებებს მხარს უჭერს, თუმცა, მეუფე იობის შეხედულებებში ეჭვი არ ეპარება, რადგან, მისივე განმარტებით, მეუფის სიტყვები ქართველი ერისთვის სასარგებლო იქნება.

მიტროპოლიტ იობისადმი სოლიდარობის აქცია დღეს „რუსთავი 2“-ის შენობასთან 16:00 საათზე უნდა უნდა გამართულიყო. თუმცა, აქციის ორგანიზატორები ადგილზე არ გამოცხადებულან. აქციის გამართვა გადაცემა „პოსტსკრიპტუმში“ რუის-ურბნისის მიტროპოლიტის მეუფე იობის შესახებ სიუჟეტმა განაპირობა. აქცია „ფეისბუქის“ მეშვეობით დაიგეგმა. სოციალურ ქსელში წერდნენ, რომ სიუჟეტის ავტორი თენგიზ გოგოტიშვილი მეუფე იობის შესახებ სარკაზმით საუბრობდა.