საქართველოს პირველი დემოკრატიული რესპუბლიკის დაარსების 100 წლის იუბილეს ფარგლებში, საქართველოს საგარეო საქმეთა სამინისტრო აგრძელებს კულტურულ-შემეცნებითი ღონისძიებების ციკლს.
საგარეო საქმეთა სამინისტროსთან არსებული ნატოსა და ევროკავშირის შესახებ საინფორმაციო ცენტრში დღეს საჯარო ლექცია თემატიკაზე - „მეოთხედი საუკუნე ემიგრაციაში - 1921 წელს უცხოეთში გატანილი საქართველოს განძეულის საერთაშორისო მნიშვნელობა“ გაიმართება, რომელსაც წაიკითხავს პროფესორი ავთანდილ მიქაბერიძე.

ავთანდილ მიქაბერიძე ლექციის ფარგლებში მიმოიხილავს 1921 წელს საფრანგეთში გატანილი და 1945 წელს დაბრუნებული საქართველოს ეროვნული განძეულის სახიფათო პერიპეტიებს, ქართული განძის კოლექციაში არსებულ არტეფაქტებს, მათი შექმნის მოტივაციების ისტორიულ-კულტუროლოგიური გარემოებების რეკონსტრუქციასა და საქართველოსთან მათ კავშირს. პროფესორი ასევე ისაუბრებს უცხოეთში წარმატებული ქართული დიასპორის წარმომადგენლების ინიციატივების შესახებ, რაც მიზნად ისახავდა მათ აქტიურ მონაწილეობას სამშობლოს აღმშენებლობის საქმეში.

პროფესორი ავთანდილ მიქაბერიძე 30-ზე მეტი სამეცნიერო ნაშრომის ავტორი, ქ. ათენის ქართული ინსტიტუტის დამფუძნებელი და დირექტორია. მინიჭებული აქვს ღირსების ორდენი და კავკასიის უნივერსიტეტის საპატიო დოქტორის სტატუსი.

საიუბილეო თარიღის ფარგლებში, საგარეო საქმეთა სამინისტრო, სხვა უწყებებთან ერთად აქტიურად არის ჩართული ქვეყნის მასშტაბით შემეცნებითი, კულტურული და საზოგადოებრივი აქტივობების ჩატარებაში. საქართველოს პირველი დემოკრატიული რესპუბლიკის ისტორიის ამ მნიშვნელოვანი პერიოდის შესახებ ცნობადობის ამაღლების მიზნით, საგარეო უწყების ორგანიზებით, დემოკრატიული რესპუბლიკის თემატიკაზე დაგეგმილია საჯარო ლექციების, ისტორიული ფოტო გამოფენების, ღია კარის დღეებისა და სტუდენტური შეჯიბრების ჩატარება.

დაგეგმილი ღონისძიებების შესახებ სრული ინფორმაციია განთავსებული საგარეო საქმეთა სამინსიტროს ვებ და სოციალური ქსელების გვერდებზე.
ლექცია 18:00 სთ-ზე დაიწყება.