ახლადდაფუძნებული ახალგაზრდული ალიანსი - „ეკონომიკური სამართლიანობისა და ბიზნესის თავისუფლებისთვის” ხვალ პირველ ბრიფინგს გამართავს და დეკლარაციას გაავრცელებს.  ამის შესახებ „ნიუსპრესს“ ალიანსიდან აცნობეს.

დეკლარაციაში ალიანსის წევრები საქართველოში კონკურენციის არარსებობაზე საუბრობენ.

„ჩვენ, ახალგაზრდები, რომლებმაც „ვარდების რევოლუციის“ შემდეგ საქართველოში მივიღეთ უმაღლესი განათლება, აღმოვჩნდით უკონკურენტო, უსამართლო და უპერსპექტივო გარემოში. ოლიგოპოლურ ეკონომიკაში არავის სჭირდება კვალიფიციური აუდიტორის, მარკეტოლოგის და ფინანსისტის ანალიზი, იურისტისა და ადვოკატის მომსახურება, რადგან სასამართლო შეჯიბრებითობა ზარმა ჩაანაცვლა, თავისუფალი მეწარმეობა კი– მონოპოლიებმა“ - ნათქვამია დოკუმენტში.

იქვე აღნიშნულია, რომ ხელისუფლებათა ცვლა და წინასაარჩევნო დაპირებები უიმედობისა და უპერსპექტივობის განცდას, რომლითაც მოცულია საქართველოს ახალგაზრდობის უმრავლესობა, ვერ შველის. დეკლარაციაში ალიანსის მიზნებზეცაა საუბარი.

„ჩვენი მხრიდან პასუხი დღევანდელობის აღნიშნულ გამოწვევებზე არის ახალგაზრდული ალიანსის დაფუძნება, რომელიც იმუშავებს საქართველოში ახალგაზრდების ღირსეული ადგილის მოსაპოვებლად, ეკონომიკური სამართლიანობის დამამკვიდრებელი ეკონომიკური მოდელის შესამუშავებლად, ბიზნესის გასათავისუფლებლად და დასაქმებისათვის აუცილებელი კონკურენტული გარემოს შესაქმნელად, პარტიათა დაპირებებისა და ეკონომიკური დოქტრინების შესაფასებლად, ქართული ბიზნესის დასაცავად და დემოკრატიული ინსტიტუტების გასაძლიერებლად“ –აღნიშნულია დეკლარაციაში.

პირველ ბრიფინგზე ალიანსი ტელეკომპანია „მაესტროს” ანტენების დაყადაღების საკითხზეც იმსჯელებს და ხელისუფლების მხრიდან სამართლებრივი პროცედურების დარღვევებისა და თავისუფალი ბიზნესის ხელყოფის ფაქტებს სამართლებრივ შეფასებას მისცემს.