გორის რაონის სოფელ კარალეთში მომხდარი ინციდენტი სრულიად საქართველოს კათოლიკოს-პატრიარქმა, უწმინდესმა და უნეტარესმა ილია მეორემ  დღეს საკვირაო ქადაგებისას დაგმო და ხელისუფლებასა და ოპოზიციას პრობლემების მშვიდობიანად მოგვარებისკენ მოუწოდა.

როგორც პატრიარქმა აღნიშნა, გასულ კვირაში მან იქადაგა, რომ ადამიანებმა ერთმანეთს ტალახი არ უნდა ესროლონ, თუმცა, ამ კვირაში უარესი ამბავი შეიტყო - ქართველები ერთმანეთს ქვებს ესვრიან.

„მივმართავ ყველას, ხელისუფლებასაც და ოპოზიციასაც, ყველა პარტიის წევრებს და რიგით ადამიანებს, მსგავსი რამ აღარ განმეორდეს. ეს არის სირცხვილი თქვენი და ქართველი ერისა. როგორ ბედავს ადამიანი, რომ იღებს ქვას და მეორეს ესვრის, სად არის თქვენი სარწმუნოება და სიკეთე“ - განაცხადა პატრიარქმა და აღნიშნა, რომ საქართველო ღვთისმშობლის წილხვედრი ქვეყანაა და ამ ქვეყნის შვილებს ასეთი საქციელი არ შეეფერება.

ილია მეორეს თქმით, ყოველი ქართველის უკან სამშობლო დგას და ადამიანებმა ერთმანეთს ისეთი რამ არ უნდა გაუკეთონ, რითაც ქვეყანა დაზარალდება.

„თქვენ შეგიძლიათ შეხვდეთ ერთმანეთს, ისუბროთ, იკამათოთ, მაგრამ ერთმანეთის ცემა, მით უფრო ქვების სროლა და იარაღით დამუქრება ყოვლად დაუშვებელია. უნდა გვახსოვდეს, რომ თუ ქართველებს შორის ურთიერთობა დაიძაბება, მტერს სწორედ ეს უნდა“ - აღნიშნა პატრიარქმა და იმედი გამოთქვა, რომ მსგავსი შემთხვევები აღარ განმეორდება.

ილია მეორემ მრევლს ქვეყანაში სიმშვიდისთვის ლოცვისკენ მოუწოდა.