საქართველოს განათლებისა და მეცნიერების მინისტრმა მიხეილ ჩხენკელმა აჭარის მუნიციპალიტეტების პედაგოგებს, დირექტორებს და რესურსცენტრის ხელმძღვანელებს ზოგადი განათლების მიმართულებით დაგეგმილი ის სიახლეები გააცნო, რომლის განხორიცელება უკვე დაწყებულია და უწყვეტ რეჟიმში გაგრძელდება.



გაწეული მუშაობისთვის მინისტრმა მათ მადლობა გადაუხადა და აღნიშნა, რომ მათი პრესტიჟის ასამაღლებლად ,მხარდასაჭერად, მუშაობის დასაფასებლად და სისტემაში პროფესიონალი კადრების მოსაზიდად, სამინისტრო არაერთ პროექტს განახორციელებს, მათ შორის ხელფასების ზრდის მიმართულებით.



მინისტრმა ვრცლად ისაუბრა მასწავლებელთა მიზნობრივ ტრენინგებზე, რომ მასზე დასწრების საშუალება, ყველა მოტივირებულ პედაგოგს უნდა მიეცეს. სიახლე კი იქნება ის, რომ ტრენინგების დიდი ნაწილი პრაქტიკული უნარ-ჩვევების განვითარებაზე იქნება ორიენტირებული. რაც შეეხება მასწავლებელთა პროფესიული განვითარების სქემას, მინისტრმა პედაგოგებს პირობა მისაცა, რომ სქემაში ბიუროკრატიული ელემენტები მინიმუმამდე დავა და ის რეალურ პროფესიულ განვითარებაზე იქნება ორიენტირებული. შესაბამისად, ახლო მომავალში სქემა განახლდება და გაუმჯობესდება.



სასკოლო სახელმძღვანელოებთან დაკავშირებით მიხეილ ჩხენკელმა განმარტა, რომ ორი წლის თავზე, სამინისტრო უზრუნველყოფს ყველა კლასის სახელმძღვანელოს, რომელიც ყველა თვალსაზრისით, განახლებული და გაუმჯობესებული იქნება.


მინისტრმა პედაგოგებს აზროვნებაზე ორიენტირებული პროექტი „ევრიკა“ გააცნო, რომელიც გაზრდის სწავლის ხარისხს და საუნივერსიტეტო სივრცეს სკოლებთან დაახლოებს. მინისტრის ინიციატივით, უნივერსიტეტების ცნობილი, დამსახურებული პროფესორ-მასწავლებლები სკოლებში, სხვადასხვა საგნებში სახალისო გაკვეთილებს ჩაატარებენ, რაც მოზარდებს მეცნიერებისადმი ინტერესს გაუღვივებს და მათი შემოქმედებითი აზროვნების განვითარებას შეუწყობს ხელს.


შეხვედრის ბოლოს, მინისტრმა უსაფრთხო სკოლის კონცეფციაზე და ამ კუთხით მთავარ გამოწვევებზე ისაუბრა, რომელი მიმართულებითაც სამინისტრო თავის მხრივ, არაერთ ღონისძიებას ახორცილებს. მინისტრმა ხაზი გაუსვა განათლებისა და შსს-ს სამინისტროების მიერ შემუშავებულ კანონპროექტს და ასევე ვრცლად ისაუბრა სკოლასა და მშობლებს შორის მომავალში გასაფორმებელ კონტრაქტებზე და ბულინგთან დაკავშირებით ცნობიერების ამაღლების სხვადასხვა გზებზე. უსაფრთხოდა ჯანსაღი ცხოვრების წესის დასამკვიდრებლად, მინისტრის აზრით, აუცილებელია სკოლებს და რეგიონებს შორის სპორტული შეჯიბრებების ორგანიზება, რადგან მოზარდმა ენერგია და დრო სპორტში დახარჯონ. თუმცა, მიხეილ ჩხენკელი მიიჩნევს, რომ ბავშვების ფსიქო-ემოციურ უსაფრთხოებაზე პასუხისმგებელი, სკოლასთან ერთად, ოჯახი და საზოგადოებაა.