საქართველოს მართლმადიდებელი ეკლესია დღეს ვლაქერნას ყოვლადწმინდა ღმრთისმშობლის კვართის დადების დღესასწაულს აღნიშნავს.
როგორც „ნიუსპრესს“ საპატრიარქოში განუცხადეს, დღესასწაულთან დაკავშირებით, ქვეყნის ყველა მართლმადიდებლულ ტაძარში საზეიმო წირვა აღევლინება.
დღესასწაულს განსაკუთრებით ზუგდიდში აღნიშნავენ. კერძოდ, ზუგდიდის ვლაქერნას ყოვლადწმინდა ღვთისმშობლის სახელობის ტაძარში საზეიმო წირვას მიტროპოლიტი გერასიმე ატარებს.
წირვის დროს დადიანების სასახლის მუზეუმიდან ღვთისმშობლის კვართს და რამდენიმე წმინდანის წმიდა ნაწილს საეკლესიო მსვლელობით მშენებარე საკათედრო ტაძარში გადააბრძანებენ.
სრულიად საქართველოს კათოლიკოს პატრიარქი, უწმინდესი და უნეტარესი ილია II კი საღმრთო ლიტურგიას სამების საკათედრო ტაძარში აღავლენს.
10-15 წლის წინ ყოვლადწმიდა ღვთისმშობლის კვართის ადგილსამყოფელი საზოგადოებისთვის უცნობი იყო. საბჭოთა პერიოდის შემდეგ ცნობილი გახდა, რომ ის ზუგდიდის დადიანების სასახლეში ინახებოდა. ისტორიული წყაროების მიხედვით, წლების განმავლობაში ის ძირითადად, ხობის მონასტერში იყო დაბრძანებული.
ყოვლადწმინდა ღვთისმშობლის კვართის საქართველოში მოხვედრის ორი ვერსია არსებობს. პირველის თანახმად, ის მე-8 საუკუნეში ბიზანტიის დედაქალაქ კონსტანტინეპოლიდან ჩამოიტანეს. მეორეს მიხედვით კი - მე-15 საუკუნეში, კონსტანტინეპოლის თურქთაგან დაპყრობის შემდეგ.
2000 წელს კვართზე იესო ქრისტეს გამოსახულება გამოჩნდა. მისი დანახვა მხოლოდ კინო ობიექტივიდან გახდა შესაძლებელი.
კონსტანტინეპოლის ვლაქერნის ღვთისმშობლის ტაძარში, სადაც ყოვლადწმიდა ქალწულის სამოსელი, თავსაბური და სარტყელის ნაწილი ინახებოდა, X საუკუნის შუა წლებში ანდრია სალოსმა ღამისთევაზე ზეციური შუქით გაცისკროვნებული ღვთისმშობელი ანგელოზებისა და წმიდათა დასის თანხლებით იხილა. მას იოანე ნათლისმცემელი და იოანე ღვთისმეტყველი კრძალვით მოაბრძანებდნენ. ყოვლადწმიდამ მუხლი მოიყარა და ქრისტიანებს უფალს დიდხანს ავედრებდა. შემდეგ ტრაპეზთან მივიდა და ლოცვა იქ განაგრძო. ბოლოს კი თავსაბური მოიხსნა და ტაძარში შეკრებილ მლოცველებს გადააფარა. ქალწული ღვთაებრივი დიდებით ბრწყინავდა, თავსაბური კი მის ხელში მზეზე ელვარებდა.