საქართველოს პარლამენტის წევრის, ახმეტისა და თელავის მაჟორიტარი დეპუტატის, გელა სამხარაულის ინიციატივით ახმეტის მუნიციპალიტეტის მოსახლეობას უფასო კარდიოლოგიური კონსულტაცია და კარდიო- დიაგნოსტიკური კვლევები ჩაუტარდა.

აქცია სსიპ ვეტერანების საქმეთა სახელმწიფო სამსახურის ორგანიზებითა და აკადემიკოს გულიკო ჩაფიძის სახელობის გადაუდებელი კარდიოლოგიის ცენტრთან თანამშრომლობით ჩატარდა.
აქციის ფარგლებში მოსახლეობამ სამედიცინო მომსახურება მაღალკვალიფიციური მედპერსონალისგან მიიღო. ახმეტის მუნიციპალიტეტის გამგეობამ, აქციის გამართულად ჩასატარებლად ადგილზე შესაბამისი პირობების შექმნაზე იზრუნა.

„მხარდამჭერი ვიქნები ყველა იმ ინიციატივის, რომლის მიზანი ადამიანებზე ზრუნვა იქნება. მითუმეტეს, თუ ეს წამოწყება ჯანმრთელობას ეხება და დაავადებების პრევენციას უკავშირდება. მაღალი კლასის სამედიცინო სერვისებით, საყოველთაო ჯანდაცვის პროგრამის ფარგლებში, ბევრი სარგებლობს. მსგავსი ხასიათის აქტივობები, კიდევ უფრო მეტ ადამიანს მისცემს პათოლოგიური პროცესების ადრეულ ეტაპზე გამოვლენის საშუალებას, რაც მკურნალობის სწორი მეთოდის შერჩევისა და სასურველი შედეგის მისაღებად, მეტად მნიშვნელოვანია. მადლობას ვუხდი ორგანიზატორებს, განსაკუთრებით კი მედპერსონალს თანადგომისთვის“- განაცხადა გელა სამხარაულმა.
უფასო სამედიცინო მომსახურებით 200-მდე ადგილობრივმა ისარგებლა.