საქართველოს ჟურნალისტური ეთიკის ქარტია ჟურნალისტების მიმართ განხორციელებულ ქმედებებს საგანგაშოდ მიიჩნევს და მოუწოდებს საგამოძიებო ორგანოებს,  დაიწყონ გამოძიება თითოეულ ფაქტთან დაკავშირებით.

ქარტია ითხოვს საზოგადოებას წარედგინოს ინფორმაცია გამოძიების მიმდინარეობისა და შედეგების შესახებ.

აღნიშნული განცხადებით ქარტია გუშინ კარალეთში მომხდარ ფიზიკურ დაპირისპირებას ეხმაურება, სადაც სხვა ჟურნალისტებთან ერთად, დაშავდა და სამედიცინო დახმარება დასჭირდა მის წევრს საბა წიწიკაშვილს. ფიზიკური და მატერიალური ზიანი მიადგათ „ინფო 9“-ს, მე-9 არხის და ტელეკომპანია „თრიალეთის“ ჟურნალისტებს - თამთა ილურიძეს, ეკა ილურიძეს, შორენა ხაბალაშვილს, ნოდარ სხირტლაძეს, ნუკრი ბეგლარაშვილს, მამუკა ქევხიშვილს, რეზო ნადირაძეს და ნინო ბოლაშვილს.

„მომხდარი ფაქტი კიდევ ერთხელ ადასტურებს, რომ ჟურნალისტებს უმძიმეს პირობებში უწევთ მუშაობა. მიუხედავად იმისა, რომ სამოქალაქო საზოგადოებისა და მედიის წარმომადგენლები მუდმივად ითხოვენ ხელისუფლების რეაგირებას ჟურნალისტთა მიმართ განხორციელებული ზეწოლისა თუ ძალადობის ფაქტებზე, ხელისუფლება კვლავ არ დგამს ქმედით ნაბიჯებს“ - ნათქვამია მიმართვაში,.

ქარტიის საბჭოს წევრენი მიიჩნევენ, რომ ჟურნალისტების მიმართ მომხდარი თითეული ფაქტის გამოუძიებლობა არის დაუსჯელობის სინდრომის წახალისება და ძალადობის ფაქტების გახშირების უშუალო მიზეზი.

საქართველოს ჟურნალისტური ეთიკის ქარტია აღნიშნავს, რომ ორგანიზაცია აერთიანებს 213 წევრ ჟურნალისტს, ზეწოლისა და ძალადობის მსხვერპლი ხშირ შემთხვევაში სწორედ მისი წევრები არიან.