მუნიციპალიტეტებში ახალგაზრდულ მიმართულებაზე პასუხისმგებელ პირებს საქართველოს განათლებისა და მეცნიერების მინისტრი მიხეილ ჩხენკელი შეხვდა. შეხვედრა ბავშვთა და ახალგაზრდობის ეროვნული ცენტრის პროექტის „CYNC ქსელი” ფარგლებში დაგეგმილ ღონისძიებაზე განხორციელდა, რომლის მიზანიც იყო საქართველოს ტერიტორიაზე მცხოვრები 14-29 წლის ახალგაზრდებისაგან საინიციატივო ჯგუფების შექმნა, მათი მონაწილეობის უზრუნველყოფა ცენტრის მიერ ორგანიზებულ პროექტებსა და სამოქალაქო აქტივობებში.

მინისტრმა ვრცელი სიტყვით მიმართა ფორუმის მონაწილეებს და ის პროექტებიც გააცნო, რასაც განათლებისა და მეცნიერების სამინისტრო ახალგაზრდული პოლიტიკის ფარგლებში გეგმავს. შეხვედრის ბოლოს, მიხეილ ჩხენკელმა მონაწილეთა მიერ დასმულ ყველა შეკითხვას ამომწურავი პასუხი გასცა.

რეგიონალურ შეხვედრაზე მონაწილეებს სიტყვით მიმართეს და სამომავლო გეგმებზე ისაუბრეს განათლებისა და მეცნიერების მინისტრის მოადგილემ თეიმურაზ მურღულიამ, ბავშვთა და ახალგაზრდობის ეროვნული ცენტრის უფროსმა გიგა გაბელაიამ, ბავშვთა და ახალგაზრდობის განვითარების ფონდის დირექტორმა ირაკლი ჟორჟოლიანმა.

ფორუმი ორდღიანია და მასზე განსახილველ საკითხებს შორისაა: მოხალისეობის ინსტიტუტის გაძლიერება; არაფორმალური განათლებისა და ახალგაზრდული საქმიანობის განვითარება; ახალგაზრდების პროფესიული ორიენტაციის, კარიერის დაგეგმვის ხელშეწყობა; ახალგაზრდებში დასაქმებისთვის საჭირო კომპეტენციების განვითარება; ადგილობრივ დონეზე ახალგაზრდული პოლიტიკის და მუნიციპალური ახალგაზრდული საქმიანობის განვითარების ხელშეწყობა; ცხოვრების ჯანსაღი წესის პოპულარიზაცია და ანტინარკოტიკული კამპანია.