თბილისის მერი კახა კალაძე მირზა ფათალი ახუნდოვის აზერბაიჯანული კულტურის მუზეუმში ნოვრუზ ბაირამის დღესასწაულთან დაკავშირებით გამართულ ღონისძიებას დაესწრო და მუსლიმებს რელიგიური დღესასწაული მიულოცა.
ღონისძიებაზე კახი კალაძემ აღნიშნა, რომ თბილისში განსხვავებული ეროვნებისა და მრწამსის მოქალაქეთა თანაცხოვრებას მრავალსაუკუნოვანი ისტორია აქვს და ეს ტრადიცია ნებისმიერი განვითარებული ქვეყნისთვის საუკეთესო მაგალითი შეიძლება იყოს.
„მინდა ნოვრუზ ბაირამის დღესასწაული ჩვენ მუსლიმ ძმებს, ჩვენ თანაქალაქელებს მივულოცო. თბილისი სხვადასხვა ეროვნების, რელიგიის წარმომადგენლების ერთიანი თანაცხოვრების მართლაც საუკეთესო მაგალითია. ჩვენ ჭირშიც, ლხინშიც, საუკუნეებია ერთად მოვდივართ. კიდევ ერთხელ მინდა მივულოცო დღევანდელი დღესასწაული - ახალი წლის, გაზაფხულის შემობრძანება ჩვენს მუსლიმ ძმებს და მშვიდობა და კეთილდღეობა ვუსურვო“ - განაცხადა კახა კალაძემ.
ღონისძიებაზე დედაქალაქის მერს საჩუქრად ქართულად ნათარგმნი „ნიზამი გაჯინი“ და აზერბაიჯანულად ნათარგმნი „ვეფხისტყაოსანი“ გადასცეს.
ნოვრუზ ბაირამი საქართველოში საერთო სახალხო დღესასწაულად 2010 წელს გამოცხადდა. ტრადიციის მიხედვით, ამ დღეს ყველა ოჯახში მწვანე ჯეჯილი უნდა იყოს. ასევე, იღებება კვერცხები და ტკბილეული ცხვება.