საქართველოს კომუნიკაციების ეროვნული კომისიის თავმჯდომარის, კახა ბექაურის განცხადებით, მსხვილმა საერთაშორისო კომპანია "იტალ ტელეკომმა" ქართული მსხვილი კომპანიისგან ძალიან კარგი შეთავაზება მიიღო. ბექაურის ინფორმაციით, ქართულ ბაზარზე შემოსვლა გლობალური ინტერნეტის მომწოდებელი კომპანიების ათეულში შემავალ კომპანიებს სურთ, რაც კონკურენციას გაზრდის და ფასებს დაწევს.
„თანდათან ჩვენ ფიქსირებულ ინტერნეტ ბაზარს დავარეგულირებთ ისე, რომ კონკურენცია იყოს მაქსიმალური, ფასებმა დაიწიოს და ხარისხმა აიწიოს თანდათან, სწრაფ ტემპებში" - განაცხადა კომუნიკაციების ეროვნული კომისიის თავმჯდომარემ.
კახა ბექაურმა ჟურნალისტების კითხვაზე, ქართული კომპანიების მხრიდან ხომ არ ყოფილა ხელოვნური ხელშეშლა გლობალური ინტერნეტის მომწოდებელი კომპანიებისთვის, აღნიშნა, რომ მსგავს ფაქტს ადგილი არ ჰქონია და რომ ამას კომისია არ დაუშვებს.
"მე როგორც ვიცი, მოლაპარაკებებს ადგილობრივი სამივე მსხვილი კომპანია აწარმოებს და ერთ-ერთისგან ძალიან კარგი შეთავაზება აქვს "იტალ ტელეკომს". თუ რაიმე პრობლემა იქნება, პირველი მე ვიქნები, ვინც ამას იტყვის"- განაცხადა ბექაურმა.