„ლეიბორისტული პარტიის“ წარმომადგენლებმა დღეს, პრეზიდენტის ადმინისტრაციასთან აქცია გამართეს, სადაც „საქართველოს ბანკისგან“ კრედიტორებისთვის სესხის რესტრუქტურიზაცია მოითხოვეს.
როგორც აქციაზე პარტიის აღმასრულებელმა მდივანმა პაატა ჯიბლაძემ აღნიშნა, რუსეთში მცხოვრები 40 მოქალაქე 2003-2005 წლებში მიხეილ სააკაშილის პიარს აჰყვა, რუსეთში თავიანთი ბიზნესი გაყიდა და საქართველოში ჩამოვიდა.
მისი თქმით, აღნიშნულმა მოქალაქეებმა თავიანთი ბიზნესის გასაგრძელებლად ქუთაისის ცენტრში მდებარე ავარიული შენობები შეიძინეს და გაარემონტეს.
„საქართველოს ბანკისგან“ ამ მოქალაქეებმა კრედიტი მსოფლიო ეკონომიკური კრიზისის შედეგად, გაკოტრების შემდეგ აიღეს, რომელშიც თავინთი უძრავი ქონება ჩადეს. სესხის თანხა 1 მლნ 300 ათას ლარს შეადგენდა, რომელთაგან მათ 1 მლნ 200 ათასი ლარი გადახდილი აქვთ, თუმცა, ბანკი მათგან დამატებითი თანხის გადახდას ითხოვს, რომლის საშუალებაც არ აქვთ“ - განაცხადა ჯიბლაძემ.
მისივე თქმით, ბანკს ქუთაისის ცენტრში მდებარე 5 მლნ ლარად შეფასებული შენობების ხელში ჩაგდება უნდა.
„ლეიბორისტებმა“ ბანკისგან კრედიტორებისთვის აღნიშნული ვალის გადახდის გადავადება, ხოლო იმ მოქალაქეებისთვის კი, რომლებსაც გადახდის საშუალება არ აქვთ, კრედიტის ჩამოწერა მოითხოვეს.
პარტიის წარმომადგენლებმა დღესვე, პრეზიდენტის ადმინისტრაციაში მიხეილ სააკაშვილის სახელზე კრედიტორების დახმარების თაობაზე მიმართვა შეიტანეს.