საპარლამენტო უმრავლესობის ლიდერის, არჩილ თალაკვაძის განცხადებით, C ჰეპატიტის პროგრამამ უკვე ძალიან ბევრ ადამიანს შეუნარჩუნა სიცოცხლე.
მისივე თქმით, C ჰეპატიტის პროგრამის წარმატებით განხორციელებაში ამერიკის მთავრობის მხარდაჭერა ფასდაუდებელია.


„C ჰეპატიტის პროგრამამ ძალიან ბევრ ადამიანს შეუნარჩუნა სიცოცხლე და ჯანმრთელობა. პროგრამაში უკვე ჩაერთო 45 000 ჩვენი თანამოქალაქე, მათ შორის ჩვენი აფხაზი ძმები და დები.
C ჰეპატიტისგან განკურნების მაჩვენებელი 98%-ია, ხოლო სკრინინგული კვლევა 900 000-ზე მეტმა ადამიანმა ჩაიტარა. ეს არის შესანიშნავი შედეგი, რისთვისაც მინდა მადლობა გადავუხადო ჯანდაცვის მინისტრს და ჯანდაცვის სამინისტროს გუნდს, დაავადებათა კონტროლის ეროვნულ ცენტრს, ექიმებსა და ექთნებს, არასამთავრობო ორგანიზაციებს და კერძო სექტორს - თქვენ ურთულეს მისიას წარმატებით ასრულებთ! ასევე, ამერიკის მთავრობის მხარდაჭერა C ჰეპატიტის პროგრამის წარმატებით განხორციელებაში ფასდაუდებელია“- განაცხადა თალაკვაძემ.