საქართველოს გარემოს დაცვისა და სოფლის მეურნეობის მინისტრის პირველმა მოადგილემ, ნოდარ კერესელიძემ, ქალაქ ბერლინში, სურსათის, სოფლის მეურნეობისა და მებაღეობის საერთაშორისო გამოფენის „მწვანე კვირეული 2018-ის″ (Gruene Woche 2018) ფარგლებში აგრარული მიმართულებით სხვადასხვა ქვეყნის დელეგაციებთან ოფიციალური შეხვედრები გამართა.
გერმანიის ფედერაციული რესპუბლიკის ბუნდესტაგის საპარლამენტო სახელმწიფო მდივანთან, პეტერ ბლეზერთან შეხვედრაზე, ნოდარ კერესელიძემ საქართველოში აგრარული და გარემოსდაცვითი მიმართულებით დაგეგმილ და განხორციელებულ პროექტებზე ისაუბრა. პეტერ ბლეზერი საქართველოში არსებული საინვესტიციო გარემოთი დაინტერესდა და ერთობლივი პროექტების განხორციელების მზადყოფნა გამოთქვა. აღსანიშნავია, რომ პეტერ ბლეზერმა 2017 წლის ზაფხულში, საქართველოში, ბიზნესდელეგაციასთან ერთად შეხვედრები გამართა, როგორც სახელმწიფო, ასევე კერძო სექტორის წარმომადგენლებთან.

გარემოს დაცვისა და სოფლის მეურნეობის მინისტრის პირველმა მოადგილემ გერმანულ მხარეს ინფორმაცია მიაწოდა საქართველოში ბოლო დროს გავრცელებული საკარანტინო მავნებლის აზიური ფაროსანას შესახებ და აღნიშნა, რომ 2017 წელს ქართულ სასოფლო-სამეურნეო კულტურის ნაწილს ზიანი მიადგა, რამაც თხილის ექსპორტის შემცირება გამოიწვია. მხარეებმა ხაზი გაუსვეს ერთობლივი ღონისძიებების გატარების მნიშვნელობას და შეთანხმდნენ ფიტოსანიტარიის კუთხით თანამშრომლობის გააქტიურების აუცილებლობაზე.

„მსგავსი გამოწვევების დროს, საჭიროა ერთობლივი ძალისხმევა, რათა დროულად იქნას პრობლემა იდენტიფიცირებული და ერთობლივი ღონისძიებები დაიგეგმოს საკითხის მოსაგვარებლად. გერმანული მხარე მზადაა ითანამშრომლოს ქართველ კოლეგებთან რისკების შემცირებისა და ფიტოსანიტარიული დაავადებების გავრცელების წინააღმდეგ ბრძოლის მიმართულებით“, - განაცხადა პეტერ ბლეზერმა.

ნოდარ კერესელიძემ მადლობა გადაუხადა პეტერ ბლეზერს გერმანული კომპანიის მიერ ჩატარებული კვლევისთვის, რომელიც საქართველოს საინვესტიციო გარემოს გაუმჯობესების კუთხით აგრარულ სექტორში გარკვეულ რეკომენდაციებს გულისხმობდა.

ვიზიტის ფარგლებში, ნოდარ კერესელიძემ შეხვედრები გამართა ლატვიის სოფლის მეურნეობის მინისტრთან, იანის დუკლავსთან, ბელორუსიის რესპუბლიკის სურსათისა და სოფლის მეურნეობის მინისტრის მოადგილესთან იგორ ბრილოსთან და ბუნდესტაგის დეპუტატთან, სამხრეთ კავკასიის საპარლამენტო ჯგუფის ხელმძღვანელთან, კარენ შტრელცთან.