საქართველოს პარლამენტის თავმჯდომარე, ირაკლი კობახიძე სრულიად საქართველოს კათოლიკოს პატრიარქს აღსაყდრებიდან 40 წლისთავს ულოცავს.
როგორც კობახიძის განცხადებაშია ნათქვამი, უწმინდესი ილია მეორე ქართველ ხალხს სწორედ მაშინ მოევლინა, როდესაც ერს სულიერების გასაძლიერებლად გამორჩეული წინამძღოლი სჭირდებოდა.

„უწმინდესო და უნეტარესო, გილოცავთ აღსაყდრებიდან 40 წლისთავს! ვულოცავ სრულიად საქართველოს, საქართველოს მოსახლეობას, ვისთვისაც მთელი ცხოვრების მანძილზე სიყვარულით, დაუღალავად იღწვით!
თქვენ ქართველ ხალხს სწორედ მაშინ მოევლინეთ, როდესაც მას სულიერების გასაძლიერებლად გამორჩეული წინამძღოლი სჭირდებოდა. თქვენი დამსახურებით, საქართველოს სამოციქულო მართლმადიდებელმა ეკლესიამ მიიღო ავტოკეფალიის აღდგენის საერთაშორისო აღიარება, აღდგა ეკლესია-მონასტრები და ქართველი ხალხი შემობრუნდა რწმენისა და ეკლესიისკენ. 40 წლის მანძილზე, თქვენი ლოცვა და მოღვაწეობა ყოველდღიურად აძლიერებს ჩვენს ხალხს და სამშობლოს.
გვაქვს უდიდესი პატივი, რომ თქვენი თანამედროვენი ვართ.
თქვენო უწმინდესობავ, საქართველოს პარლამენტის სახელით, გულითადად გილოცავთ აღსაყდრებიდან 40 წლისთავს! ჯანმრთელობასა და დღეგრძელობას გისურვებთ უფლის სადიდებლად და საქართველოს საკეთილდღეოდ!“- ნათქვამია კობახიძის განცხადებაში.