საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის მოადგილეები და დევნილთა საკითხების შემსწავლელი კომისიის წევრები იმ დევნილ ოჯახებს ხვდებიან, რომლებმაც ამ ეტაპზე, გორში 8 ახალაშენებულ კორპუსში ბინები ვერ მიიღეს და საცხოვრებელი ფართების განაწილების პროცესთან დაკავშირებით შეკითხვები აქვთ.
მინისტრის პირველი მოადგილის გრიგოლ გიორგაძის განცხადებით, ყველა დევნილის შეკითხვას ამომწურავი პასუხი გაეცემა. მინისტრის მოადგილე გორში ერთ-ერთი მოქალაქის მიერ თვითდაზიანების მიყენების ფაქტსაც გამოეხმაურა და განაცხადა, რომ აღნიშნულ პიროვნებას დევნილის სტატუსი არ აქვს.
„გორში განხორციელდა უპრეცედენტო მშენებლობა, 8 ათსართულიანი კორპუსი აშენდა სწორედ იმ დევნილი ოჯახებისთვის შიდა ქართლში, რომლებსაც არ გააჩნიათ ალტერნატიული საცხოვრებელი საკუთრებაში, ცხოვრობენ ნგრევად ობიექტებში ან კერძო სექტორში, მაგრამ საკუთარი სახლი არ აქვთ. იმისთვის, რომ შევარჩიოთ ასეთი დევნილი ოჯახები ვატარებთ მონიტორინგს. მონიტორინგის ჯგუფები დევნილ ოჯახებს ინდივიდუალურად სწავლობენ და ეს ინფორმაცია განსახილველად გამოდის კომისიაზე. კომისიის მუშაობაში მონაწილეობენ სახალხო დამცველის აპარატის, არასამთავრობო ორგანიზაციების, აფხაზეთის ლეგიტიმური მთავრობის წარმომადგენლები და ყველა დაინტერესებული პირი. ბინების განაწილების პროცესი მიმდინარეობს გამჭვირვალედ. ყველა ოჯახს განვიხილავთ ინდივიდუალურად და შემდეგ ვიღებთ გადაწყვეტილებას. გადაწყვეტილების მიღების შემდეგ, ჩვენ, რა თქმა უნდა, არ გამოვრიცხავთ, რაღაც ხარვეზი შესაძლოა გაპარულიყო, ეს შეიძლება იყოს, რომ არასწორად მივეცით ბინა ან პირიქით, რომელიმე ოჯახს ეკუთვნოდა და არ მივეცით. ამიტომ, ჩამოვდივართ ადგილზე ყოველთვის ყველა რეგიონში სადაც ბინებს ვანაწილებთ, ვიღებთ ინდივიდუალურად დევნილ ოჯახებს და ვისმენთ მათ პრეტენზიებს და ყოფილა შემთხვევები, როდესაც ეს გადაწყვეტილება კონკრეტულ ოჯახებთან მიმართებაში შეცვლილა როგორც დადებითი, ასევე უარყოფითიც. ამ ოჯახებისგან სწორედ ეს ინფორმაციები გვჭირდება. ჩვენს ვებ-გვერდზეც გამოქვეყნდა, რომ თუ ვინმეს აქვს ინფორმაცია, რომ რომელიმე დევნილი ოჯახი არასწორად იღებს ბინას და აქვს ალტერნატიული საცხოვრებელი და ეს ფაქტი ჩვენთვის არ გახდა ცნობილი ამისათვის გვჭირდება მათი ინფორმაცია და მათი დახმარება და შემდეგ ამ გადაწყვეტილებას ჩვენ შევცვლით თითოეული ასეთი ოჯახის მიმართ და პირიქითაც.

რაც შეეხება იმ ინციდენტს რომელიც აქ მოხდა, ადამიანი რომელმაც მიიყენა ფიზიკური დაზიანება არ გახლავთ დევნილი, მისი მეუღლე არის დევნილი. ეს ოჯახი ცხოვრობს ამ არადევნილი პიროვნების მამა-პაპისეულ სახლში, რომელმაც ფიზიკური დაზიანება მიიყენა. ჩვენ, როგორც გითხარით, პირველ რიგში ისეთ ოჯახებს ვაძლევთ ბინებს ვისაც რაიმე ალტერნატიული საცხოვრებელი არ აქვს. ჩვენ რომ მიგვეცა ასეთი ოჯახისთვის ბინა, აბსოლუტურად სამართლიანი პრეტენზიები ექნებოდათ სხვა დევნილ ოჯახებს“, - განაცხადა გრიგოლ გიორგაძემ.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ გორში 480 დევნილი ოჯახის განსახლების მიზნით, 8 ათსართულიანი კორპუსი ააშენა. სამინისტროს ვებ-გვერდზე გამოქვეყნდა იმ დევნილი ოჯახების სია, რომლებსაც გრძელვადიანი განსახლების კრიტერიუმების შესაბამისად, ახალაშენებულ კორპუსებში ბინები გადაეცემათ. კომისიის გადაწყვეტილებით, შიდა ქართლის რეგიონში 5 ნგრევადი ობიექტი იხურება.