კომპანია „ჯორჯიან უოთერ ენდ ფაუერის“ წარმომადგენლები შპს „კრისტალის“ ხელმძღვანელის ლევან დაუთაშვილის განცხადებას წყლის  მიწოდებაში შესაძლო პრობლემების თაობაზე უარყოფს და თბილისის წყალმომარაგების სისტემაში პრობლემების წარმოქმნას გამორიცხავს.
როგორც „ჯორჯიან უოთერ ენდ ფაუერის“ განცხადებაშია ნათქვამი, თბილისის წყალმომარაგებას არავითარი საფრთხე არ ექმნება და არც მომავალში შეექმნება.
„კომპანია „ჯორჯიან უოთერ ენდ ფაუერს“ ქლორის საკმაოდ დიდი მარაგი გააჩნია. ამასთან, „კრისტალი“ არ არის ერთადერთი კომპანია, რომელიც „ჯორჯიან უოთერ ენდ ფაუერს“ ქლორს აწვდის“ - ნათქვამია განცხადებაში.
შპს „კრისტალის“ ხელმძღვანელმა ლევან დაუთაშვილმა განაცხადა, რომ მისი დაპატიმრებით თბილისის წყალმომარაგებას საფრთხე შეექმნება. როგორც მან საქალაქო სასამართლოში აღნიშნა, ამ ეტაპზე „კრისტალი“ ერთადერთი კომპანიაა, რომელიც წყლის კომპანიებს ქლორით ამარაგებს.
„კრისტალს“ ალტერნატივა არ ჰყავს და სხვა ორგანიზაციის გამოჩენამდე შესაძლოა, თბილისის წყალმომარაგებას საფრთხე შეექმნას“ - განმარტა დაუთაშვილმა.
ლევან დაუთაშვილს დღეს თბილისის საქალაქო სასამართლომ აღმკვეთი ღონისძიების სახით პატიმრობა შეუფარდა. „კრისტალის“ კუთვნილი ავზიდან, რამდენიმე დღის წინ კონცენტრირებულმა ქლორმა გაჟონა, რის შედეგადაც ლილოს საქნავთის დასახლებაში 70-ზე მეტი მოქალაქე მოიწამლა.