„უფლებადამცველთა გაერთიანების“ ხელმძღვანელმა ნიკოლოზ მჟავანაძემ, გაზეთ „რუსთავის ამბებმა” და მომღერალმა ნანა ბელქანიამ საქართველოს  შრომის, ჯანმრთელობისა და სოციალური დაცვის სამინისტროს წინ ერთობლივი აქცია-პრესკონფერენცია გამართეს.
აქციის მონაწილეების ინფორმაციით, მომღერალი ნანა ბელქანია რუსეთისა და საქართველოს მოქალაქეა. იგი შვიდი წელია საქართველოში ცხოვრობს და პენსიასაც იღებდა.
მათივე განმარტებით, ერთი თვის წინ, როდესაც სახელმწიფო უწყებებისთვის ცნობილი გახდა, რომ ბელქანია რუსეთის მოქალაქეც იყო, სოციალური მომსახურების სააგენტოს რუსთავის სოციალური მომსახურების ცენტრის გადაწყვეტილებით, მას პენსია უკანონოდ შეუწყდა, ხოლო მოტივად ორმაგი მოქალაქეობა დასახელდა.
„უფლებადამცველთა გაერთიანებაში“ აცხადებენ, რომ ეს კანონის უხეში დარღვევაა, რადგან „სახელმწიფო პენსიის შესახებ“ კანონის ზოგადი პრინციპებიდან არ გამომდინარეობს, რომ ორმაგი მოქალაქეობა შესაძლოა, პენსიის შეწყვეტის საფუძველი გახდეს.
„უფლებადამცველთა გაერთიანების“ ხელმძღვანელის ნიკოლოზ მჟავანაძის განმარტებით, ნანა ბელქანიას ორმაგი მოქალაქეობა საქართველოს პრეზიდენტის 2006 წლის 27 ნოემბრის ბრძანებულებით მიენიჭა, მას შემდეგ კი, იგი საქართველოში ცხოვრობს და რუსეთის ფედერაციაში არც ყოფილა. მჟავანაძისთვის გაუგებარია, თუ რა ლოგიკითა და რა სამართლებრივი საფუძვლით შეუწყდა პენსია ბელქანიას.
„მას შემდეგ, რაც ნანა ბელქანიამ მოგვმართა „უფლებადამცველთა გაერთიანებას”, ჩვენს მიერ ადმინისტრაციული საჩივარი შევიდა სსიპ სოციალური მომსახურების სააგენტოში, უკანონო გადაწყვეტილების ბათილად ცნობის მოთხოვნით, ვინაიდან გადაწყვეტილება ეყრდნობა მცდარ სამართლებრივ საფუძველს“- განაცხადა მჟავანაძემ და იმედი გამოთქვა, რომ ხელისუფლება შეცვლის მის მიერ მიღებულ უკანონო გადაწყვეტილებას და წინასაარჩევნო დაპირება - „მეტი სიკეთე ხალხს“ დაპირებადვე არ დარჩება.