თბილისის მერის ინფორმაციით, საახალწლო კონცერტში წელს ბევრად მეტი მომღერალი მიიღებს მონაწილეობას, ვიდრე წინა წლებში.

აღნიშნულის შესახებ კახა კალაძემ დღეს გამართულ ბრიფინგზე ისაუბრა.

მისივე თქმით, უნდა დასრულდეს მომღერლების პოლიტიკური ნიშნით არჩევა, რაც მმართველი გუნდისთვის კატეგორიულად მიუღებელია.

„ძალიან მნიშვნელოვანია, რომ საახალწლო კონცერტში წელს მონაწილეობას ბევრი მომღერალი მიიღებს. ჩვენ საბოლოოდ უნდა დავანგრიოთ ის სტერეოტიპი, რომ მომღერლების არჩევა გარკვეული პოლიტიკური შეხედულებების გამო ხდებოდა. ეს პირადად ჩემთვის მავნე პრაქტიკაა, რაც ჩვენი გუნდისთვის მიუღებელია. გპირდებით, რომ წელს თქვენთვის ძალიან ბევრი საყვარელი მომღერალი იმღერებს. ასევე, არანაკლებ საგულისხმოა, რომ მაქსიმალურად ვეცდებით, თბილისის საკვანძო ქუჩები არ გადაიკეტოს, რადგან მოსახლეობას თავისუფლად გადაადგილების საშუალება ჰქონდეს“, - აღნიშნა დედაქალაქის მერმა.