ინგოროყვას საუნივერსიტეტო კლინიკის რეანიმაციულ განყოფილებაში მოთავსებული, კონცენტრირებული ქლორის ჰაერში გაჟონვის შედეგად მოწამლული 18 წლის ლაშა ნარიმანიძის მდგომარეობა ამ დრომდე უკიდურესად მძიმეა.

როგორც „ნიუსპრესს“ ინგოროყვას კლინიკაში განუცხადეს, იგი ისევ მართვით სუნთქვაზე რჩება.

მათი ინფორმაციით, ლაშა ნარიმანიძე ისევ საავადმყოფოში შეყვანის დროს დაფიქსირებულ მგდომარეობაშია. კლინიკაში მიყვანისას მას გული პრაქტიკულად გაჩერებული ჰქონდა.

ქლორით ინტოქსიკაციის დიაგნოზით კლინიკაში პაციენტთა მეორე ტალღაც შევიდა. ინგოროყვას კლინიკის სასწრაფო-გადაუდებელი დახმარების განყოფილებას 18 პაციენტმა, ხოლო ამბულატორიულ განყოფილებას 13-მა მიმართა. შესაბამისი მკურნალობის შემდეგ, მათ კლინიკა მალევე დატოვეს.

მედიკოსების განცხადებით, საავადმყოფოში გუშინ დღის ბოლოს კიდევ 7 პაციენტი მოათავსეს.

ჰაერში კონცენტრირებული ქლორის გაჟონვის შედეგად ლილოს, საქნავთის დასახლებაში 70-მდე ადამიანი მოიწამლა.

კონცენტრირებული ქლორით სავსე ავზის მფლობელი კომპანია „კრისტალია“, რომელიც გაერთიანებული წყალმომარაგების კომპანიის კონტრაქტორი ფირმაა. მისი ხელმძღვანელი ლევან დაუთაშვილი პოლიციამ 4 ივლისს დააკავა. მის წინააღმდეგ სისხლის სამართლის საქმე სსსკ-ის 288-ე მუხლითაა აღძრული. ბრალის დამტკიცების შემთხვევაში მას 2-დან 5 წლამდე ვადით თავისუფლების აღკვეთა ემუქრება.