თბილისის მერის განცხადებით, კიდევ ერთი საკითხი, რომელსაც განსაკუთრებულ ყურადღებას მივაქცევს მერია მომდევნო წლების განმავლობაში, შენობა-ნაგებობების უსაფრთხოება იქნება. ამის შესახებ კახა კალაძემ დღეს, მთავრობის სხდომაზე განაცხადა.

როგორც თბილისის მერმა აღნიშნა, ცენტრალურ ხელისუფლებასთან ერთად 41-ე დადგენილებაში მნიშვნელოვანი ცვლილება შევიდა. კახა კალაძის თქმით, ახალი წესები მეტწილად სახანძრო უსაფრთხოებას ეხება.

„ჩვენთვის უმნიშვნელოვანესია ადამიანების უსაფრთხოება. ამიტომ უმკაცრესი რეაგირება მოჰყვება ჩვენი მხრიდან სამშენებლო წესების დარღვევას“, - განაცხადა კახა კალაძემ.

თბილისის მერმა ყურადღება გაამახვილა ასევე უნებართვო და პროექტის დარღვევით მიმდინარე მშენებლობებზე. კახა კალაძემ თბილისის მერიის ზედამხედველობის სამსახურის უფროსს მკაცრი ზომების მიღება და დროული დემონტაჟის სამუშაოების დაწყება დაავალა.

„მინდა ზედამხედველობის სამსახურს და მის ხელმძღვანელს გიორგი ბაგრატიონს დავავალო მაქსიმალური ყურადღების გამოჩენა, მკაცრი ზომების მიღება და დროული დემონტაჟის სამუშაოების დაწყება, რადგან ქალაქში ძალიან მომრავლდა ისეთი შენობა-ნაგებობები, რომელიც დედაქალაქის იერსახეს ამახინჯებს“, - განაცხადა კახა კალაძემ.