კონცენტრირებული ქლორით სავსე ავზის მფლობელ კომპანია „კრისტალის“ ხელმძღვანელს ლევან დაუთაშვილს აღმკვეთი ღონისძიება დღეს შეეფარდება.

დაუთაშვილი შსს-ს თანამშრომელბმა გუშინ დააკავეს. მის მიმართ საქმე აღძრულია გარემოსთვის საშიში ნივთიერებისადმი ან ნარჩენისადმი მოპყრობის წესის დარღვევის მუხლით, რაც 2-დან 5 წლამდე ვადით თავისუფლების აღკვეთას ითვალისწინებს.

ამ დროისთვის საავადმყოფოებში ქლორის გაჟონვის შედეგად ინტოქსირებულთაგან 21 პაციენტი აგრძელებს მკურნალობას.

კვლავ მწვავე კომატოზურ მდგომარეობაშია 18 წლის ლაშა ნარიმანიძე, რომელიც მართვით სუნთქვაზეა.

სხვადასხვა მონაცემებით, ქლორის გაჟონვის შედეგად 80-მდე დაშავებულმა მიაკითხა საავადმყოფოებს დაშავებულთა შორის არიან მცირეწლოვანი ბავშვებიც. საამედიცინო დაწესებულებებისადმი მიმართვა შესაძლოა, დღესაც გაგრძელდეს.

„კრისტალი", რომელსაც კონცენტრირებული ქლორით სავსე ავზი ეკუთვნოდა, გაერთიანებული წყალმომარაგების კომპანიის კონტრაქტორი ფირმაა. ავზიდან ქლორმა 4 ივლისს ღამით ლილოს დასახლებაში გაჟონა.