თბილისის მერიის ცნობით, 2014 წლის აგვისტოდან დღემდე, ნაძალადევის რაიონში კორპუსების ინფრასტრუქტურის მოწესრიგებისთვის 970 პროექტი განხორციელდა. სარეაბილიტაციო სამუშაოები, ნაძალადევის რაიონის გამგეობის ბინათმესაკუთრეთა ამხანაგობების ხელშეწყობის პროგრამის ფარგლებში შესრულდა. ამ ეტაპზე მიმდინარე 20-მდე პროექტი კი წლის ბოლომდე დასრულდება.

კორპუსებში საცხოვრებელი გარემოს გაუმჯობესების მიზნით, ნაძალადევის რაიონის გამგეობის თანადაფინანსებით, ძირითადად, შემდეგი სახის პროექტები ხორციელდება:

 წყალ-კანალიზაციის შიდა ქსელის შეცვლა (გამგეობის დაფინანსება 85%)
 ბრტყელი და ქანობიანი სახურავების რეაბილიტაცია (80%)
 4-5 სართულიანი შენობის კაპიტალური გამაგრება (90%)
 კაპიტალური გამაგრების პროექტის შედგენის მომსახურება (90%)
 კორპუსებში სართულშუა ნაპრალების რეაბილიტაცია (80%)
 ლიფტების რეაბილიტაცია (80%)
 სადარბაზოების შიდა რემონტი (80%)
 სადარბაზოებში მეტალის კარების მონტაჟი (80%)
 სადარბაზოებში სენსორული განათების მოწყობა (90%)
 საერთო სარგებლობის კიბეების რეაბილიტაცია (80%)
 წყალსაწრეტი მილების შეცვლა (80%)

3 წლისა და 3 თვის განმავლობაში, კორპუსების ინფრასტრუქტურის მოსაწესრიგებლად შესრულებული სამუშაოებისთვის გამგეობის ბიუჯეტიდან 9 908 706 ლარი გამოიყო.