საქართველოს პროფესიული კავშირების გაერთიანება მთავრობის გადაწყვეტილებას დასაქმების სახელმწიფო მინისტრის აპარატის შექმნასთან დაკავშირებით, დადებითად აფასებს.
როგორც „ნიუსპრესს“ პროფკავშირებიდან აცნობეს, გაერთიანება უკანასკნელი წლების მანძილზე მუდმივად აყენებდა საკითხს დასაქმების ერთიანი სახელმწიფო სტრატეგიის შემუშავების, დასაქმებაზე პასუხისმგებელი სახელმწიფო ორგანოს ჩამოყალიბებისა და უმუშევართა ერთიანი ბაზის შექმნის აუცილებლობაზე.
„პროფკავშირების გაერთიანება მიიჩნევს, რომ უმუშევრობა საზოგადოების წინაშე არსებულ ერთ-ერთ უმთავრეს გამოწვევად რჩება. სწორედ ამ მდგომარეობის გამოსწორების მიზნით, ჯერ კიდევ 2008 წელს, პროფკავშირებმა შეიმუშავა კანონპროექტი უმუშევართათვის სახელმწიფო შემწეობის დაწესების თაობაზე, რაც სამწუხაროდ, საქართველოს პარლამენტის მიერ დღემდე ყოველგვარი რეაგირების გარეშეა“ - აცხადებენ პროფკავშირებში
გაერთიანებაში იმედოვნებენ, რომ ახლადშექმნილი დასაქმების სახელმწიფო მინისტრის აპარატი, პროფკავშირებთან მჭიდრო თანამშრომლობითა და ამ პრობლემის წინააღმდეგ ბრძოლაში დაინტერესებული მხარეების სრული ჩართულობის გზით, შეეცდება საქართველოს თითოეული მოქალაქის საჭიროებებზე ორიენტირებული დასაქმების სახელმწიფო პოლიტიკის შემუშავებას, რაც არსებული მძიმე სოციალური ფონის შემსუბუქებას ხელს შეუწყობს.
„იმედს ვიტოვებთ, რომ დასაქმების სახელმწიფო მინისტრი, ცივილიზებული სამყაროს მიერ აღიარებული შრომის ღირსეულ პრინციპებზე დაფუძნებული ღირსეული დასაქმების ხელშემწყობი იქნება, რაც ბუნებრივია, თითოეულ მოქალაქეს გაუჩენს იმის განცდას, რომ ის ჩართულია ქვეყნის განვითარების პროცესებში და მასზე სახელმწიფო ზრუნავს“- აცხადებენ ორგანიზაციაში.
მათივე ცნობით, პროფკავშირები მზადაა აღნიშნულ უწყებას წლების განმავლობაში, დასაქმებისა და უმუშევრობის საკითხებზე მუშაობის შედეგად დაგროვილი გამოცდილება გაუზიაროს.