ბათუმში აგრო-სასურსათო პროდუქციის და ტექნოლოგიების მე-7 საერთაშორისო გამოფენა „Agro Batumi 2017” გაიხსნა. გამოფენას აჭარის მთავრობის თავმჯდომარე ზურაბ პატარაძე და ქალაქ ბათუმის მერი გიორგი ერმაკოვი აღმასრულებელი და საკანონმდებლო ხელისუფლების წარმომადგენლებთან ერთად ესწრებოდნენ. ისინი ადგილზე წარმოდგენილ პროდუქციას გაეცნენ და გამოფენის მონაწილეებს გაესაუბრნენ.
ზურაბ პატარაძის თქმით, მსგავსი დარგობრივი გამოფენები ხელს უწყობს ადგილობრივი პროდუქციის პოპულარიზაციას, ფერმერებს და კომპანიებს შორის საქმიანი ურთიერთობების დამყარებას.
აჭარის მთავრობის პრესსამსახურის ინფორმაციით, აგრო-სასურსათო პროდუქციის და ტექნოლოგიების გამოფენაში წელს ადგილობრივ კომპანიებთან ერთად თურქული, ირანული და უკრაინული კომპანიები მონაწილეობენ.
„Agro Batumi 2017” აჭარის ა.რ. მთავრობის, აჭარის ა.რ. სოფლის მეურნეობის სამინისტროს, ბათუმის მერიის, ა (ა) იპ აგროსერვის ცენტრის, აჭარის სავაჭრო-სამრეწველო პალატისა და საქართველოს საერთაშორისო ინვესტორთა ასოციაციის თანაორგანიზატორობითა და მხარდაჭერით იმართება.
ბათუმის ყინულის სასახლე საერთაშორისო გამოფენას სამი დღის განმავლობაში უმასპინძლებს.