საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი მესტიაში გამართულ დევნილთა საარსებო წყაროების ფორუმს დაესწრო.

დევნილთა სამინისტროს პრესსამსახურის ინფორმაციით, ფორუმის მონაწილე სამთავრობო და არასამთავრობო ორგანიზაციების წარმომადგენლებმა დევნილებს საარსებო წყაროების მიმართულებით არსებული პროგრამები გააცნეს. მათ შესაძლებლობა ჰქონდათ, ერთ სივრცეში მიეღოთ საჭირო ინფორმაცია და ქვეყანაში მოქმედ საარსებო წყაროების პროგრამებშიც ჩართულიყვნენ.

დევნილთა საარსებო წყაროებით უზრუნველყოფის სააგენტოს პროგრამებში მონაწილეობის მსურველი დევნილების განაცხადები, იუსტიციის სახლის წარმომადგენელმა ადგილზე ჩაიბარა. სააგენტო დევნილებს მცირე მეწარმეობის დასაწყებად, სოციალური პროექტების განსახორციელებლად და დასაქმებისთვის საჭირო ხელსაწყოების შესასყიდად გრანტებს გადასცემს.

უწყების ცნობით, მესტიაში გამართულ შეხვედრას დევნილებისთვის საარსებო წყაროებზე ხელმისაწვდომობის უზრუნველყოფის სტრატეგიის, 2016-2017 წლების, სამოქმედო გეგმის განხორციელებაში ჩართული სახელმწიფო სტრუქტურების წარმომადგენლებიც ესწრებოდნენ. ფორუმში სამეგრელო-ზემო სვანეთის რეგიონში საარსებო წყაროების მიმართულებით მომუშავე სამთავრობო და არასამთავრობო ორგანიზაციებიც მონაწილეობდნენ.