ხორვატიული კომპანია IGH ყოველთვიურ სტიპენდიას დაუნიშნავს სამშენებლო ფაკულტეტის მაგისტრატურის ხუთ წარმატებულ სტუდენტს, დაეხმარება ფაკულტეტს საგანმანათლებლო აკადემიური პროგრამების განვითარებაში, მონაწილეობას მიიღოს დამსაქმებელთა მრჩეველთა საბჭოს მუშაობაში, უზრუნველყოფს სტუდენტებისთვის პრაქტიკების ორგანიზებას კომპანიის თბილისის ოფისში.

თანამშრომლობის ამ და სხვა მიმართულებებს ითვალისწინებს მემორანდუმი, რომელიც დღეს საქართველოს ტექნიკურ უნივერსიტეტსა და ხორვატიული საინჟინრო კომპანია IGH-ს შორის გაფორმდა. მემორანდუმს ხელი მოაწერეს საქართველოს ტექნიკური უნივერსიტეტის რექტორმა, აკადემიკოსმა არჩილ ფრანგიშვილმა და სს „ინსტიტუტი IGH“-ის დირექტორთა საბჭოს პრეზიდენტმა ივან პალადინამ.

ხორვატიული საინჟინრო კომპანია აპირებს რამდენიმე მიმართულებით ითანამშრომლოს საქართველოს ტექნიკურ უნივერსიტეტთან, კერძოდ, დაუნიშნოს ყოველთვიური სტიპენდია სამშენებლო ფაკულტეტის მაგისტრატურის ხუთ წარმატებულ სტუდენტს, დაეხმაროს ფაკულტეტს საგანმანათლებლო აკადემიური პროგრამების განვითარებაში, მონაწილეობა მიიღოს დამსაქმებელთა მრჩეველთა საბჭოს მუშაობაში, უზრუნველყოს სტუდენტებისთვის პრაქტიკების ორგანიზება კომპანიის თბილისის ოფისში, საქართველოში არსებულ საზედამხედველო ობიექტებზე და საპროექტო-საველე სამუშაოებში.

როგორც ხელმოწერის ცერემონიალზე სს „ინსტიტუტი IGH“-ის დირექტორთა საბჭოს პრეზიდენტმა ივან პალადინამ აღნიშნა, კომპანია უნივერსიტეტს დაეხმარება შესაბამისი, თანამედროვე სახელმძღვანელოების მოძიებაში, უნივერსიტეტს მიაწვდის საკუთარ შეხედულებებსა და რჩევებს არსებული და დაგეგმილი სასწავლო პროგრამების შესახებ, დაეხმარება უნივერსიტეტს ზაგრების ტექნიკურ უნივერსიტეტთან აღნიშნული მიმართულებით თანამშრომლობაში. მხარეები, მოამზადებენ ერთობლივ სამეცნიერო სტატიებს ინოვაციების, თანამედროვე ტექნოლოგიების და ევროპული სტანდარტების შესახებ. კომპანიის წამყვანი სპეციალისტები უნივერსიტეტის სტუდენტებისთვის ჩაატარებენ სასწავლო სემინარებს.

უნივერსიტეტის რექტორმა, აკადემიკოსმა არჩილ ფრანგიშვილმა მადლობა გადაუხადა კომპანიის წარმომადგენლებს უნივერსიტეტთან თანამშრომლობის სურვილისთვის და იმედი გამოთქვა, რომ ტექნიკური უნივერსიტეტის სტუდენტებისთვის ხორვატიულ კომპანიასთან თანამშრომლობა წაადგება მათი კვალიფიკაციის ამაღლებას და სამომავლოდ მათ პერსპექტიულ დასაქმებას.
შეხვედრას ესწრებოდა საავტომობილო გზების დეპარტამენტის თავმჯდომარე გიორგი სეთურიძე. როგორც სეთურიძემ აღნიშნა, საქართველოს მთავრობა უახლოეს პერიოდში გეგმავს განახორციელოს მნიშვნელოვანი ინფრასტრუქტურული პროექტები, რომლებშიც ჩაერთვებიან ახალგაზრდა, კვალიფიციური კადრები. „ჩვენ ვთხოვეთ კონტრაქტორებს ეზრუნათ კადრების მომზადებასა და გადამზადებაზე. ჩვენს თხოვნას პირველი ხორვატიული კომპანია IGH გამოეხმაურა. ტექნიკურ უნივერსიტეტთან გაფორმებული მემორანდუმი ამ მიმართულებით გადადგმული ნაბიჯია“;- განაცხადა სეთურიძემ

IGH უკვე თანამშრომლობს საავტომობილო გზების დეპარტამენტთან და ახორციელებს გზების რეაბილიტაცია-მშენებლობის და მოვლა-შენახვის საზედამხედველო საქმიანობას, აგრეთვე მუშაობს რამდენიმე მიმართულებით გზების მშენებლობის პროექტირებაზე. კერძოდ, ახორციელებს ლენტეხი-მესტიის გვირაბის, სნო-შატილი-ახმეტა შემოვლითი გზის, ქუთაისი-აბასთუმნის მონაკვეთის და ზემო იმერეთი-რაჭის გზის საპროექტო სამუშაოებს.

კომპანია IGH დაინტერესებულია საქართველოში საქმიანობის გაფართოვებით. თბილისში ვიზიტად მყოფმა კომპანიის სამეთვალყურეო საბჭოს წევრმა ოლივერ კუმრიჩმა და კომპანიის დირექტორთა საბჭოს პრეზიდენტმა ივან პალადინამ სამომავლო თანამშრომლების პერსპექტივებთან დაკავშირებით შეხვედრები გამართეს საჯარო და კერძო სექტორის წარმომადგენლებთან, მათ შორის საქართველოს რეგიონული განვითარებისა და ინფრასტრუქტურის სამინისტროში, საქართველოს გარემოსა და ბუნებრივი რესურსების დაცვის სამინისტროში, „საქართველოს მელიორაციაში“, "საქართველოს რკინიგზაში". შეხვედრებზე განიხილეს IGH-ის ახალ პროექტებში ჩართვის შესაძლებლობები და ევროპული სტანდარტების დანერგვაში თანამონაწილეობის შესაძლებლობები.

ხორვატიულმა კომპანია IGH-მა საქართველოში საქმიანობა 2016 წლის ბოლოს დაიწყო, როცა საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტთან გააფორმა ხელშეკრულება, საერთაშორისო და შიდასახელმწიფოებრივი მნიშვნელობის გზებზე შესასრულებელი მიმდინარე შეკეთების, პერიოდული შეკეთების, რეაბილიტაციის. რეკონსტრუქციის, მოდერნიზაციის, მშენებლობის და სხვა ფორსმაჟორული მოვლენების შედეგების ლიკვიდაციის და ნაპირსამაგრ სამუშაოებზე საზედამხედველო მომსახურების შესახებ. IGH-მა გახსნა ოფისი თბილისში, სადაც დასაქმებულია 68 სპეციალისტი/ექსპერტი, მათ შორის 16 ხორვატი და 52 ქართველი. კომპანიის ფილიალის თანამშრომლები არიან ახალგაზრდა დამპროექტებელი და ზედამხედველი ინჟინრები, თარჯიმნები, მოვლა-შენახვის სპეციალისტები, ადმინისტრაციული პერსონალი და მძღოლები.

IGH-ს, საქართველოს გარდა, ფილიალები აქვს ბოსნია-ჰერცოგოვინაში, მონტენეგროში, სერბეთში, ბულგარეთში, ალბანეთში, კოსოვოში. კომპანია საქმიანობს ყაზახეთში, რუსეთსა და უკრაინაში.

კომპანია 1949 წელს დაარსდა. მისი ძირითადი საქმიანობა მოიცავს მშენებლობების პროექტირებასა და ტექნიკურ ზედამხედველობას, პროექტების მართვას, კვლევებს, საკონსულტაციო მომსახურებას, სამშენებლო მასალების ლაბორატორიულ ტესტირებას, სტანდარტიზაციას. კომპანიის მიერ დაპროექტებულია 800 ხიდი, 80 კმ საერთო სიგრძის გვირაბი, მათ შორის ყველაზე გრძელი გვირაბი ხორვატიაში - Mala Kapela, რომლის სიგრძე 5760 მეტრია, აღიარებულია როგორც ყველაზე უსაფრთხო ევროპაში (2008 და 2009 წლები).