საზოგადოებრივი ტრანსპორტი, პეკინის ქუჩაზე მიმდინარე წლის 23 სექტემბრიდან ორმხრივად იმოძრავებს.

თბილისის მერიის პრესსამსახურის ინფორმაციით, N6 და N87 ავტობუსები და ასევე, სამარშუტო მიკროავტობუსები კოსტავას ქუჩიდან მიროტაძის ქუჩის გავლით, ვაჟა-ფშაველას გამზირისა და ჟვანიას მოედნის მიმართულებით მათთვის გამოყოფილ სპეციალურ ზოლში გადაადგილდებიან.

ხოლო, პეკინის ქუჩიდან 26 მაისის მოედნის მიმართულებით: N6, 85, 47, 92, 150 და N42 ავტობუსები იმოძრავებენ.
პეკინზე საზოგადოებრივი ტრანსპორტი მხოლოდ გაჩერებებზე გაჩერდება.
უწყების ინფორმაციითვე, საზოგადოებრივი ტრანსპორტისთვის ორმხრივი მოძრაობის რეჟიმი შარტავასა და კოსტავას ქუჩებზეც აღდგება. ჟვანიას მოედნიდან 26 მაისის მოედნამდე N14, 29 და N49 მარშუტის ავტობუსები საზოგადოებრივი ტრანსპორტისთვის გამოყოფილ ზოლში გადაადგილდებიან.

ვახუშტის ხიდიდან და გოთუას ქუჩიდან სააკაძის მოედნისა და მიროტაძის ქუჩების გავლით პეკინის ქუჩისა და გმირთა მოედნისკენ N51 და N91 ავტობუსებიც იმოძრავებენ.
იმ ავტომობილების მძღოლების მიმართ, რომლებიც ავტობუსებისა და მიკროავტობუსებისთვის განკუთვნილ გზის სავალ ნაწილზე იმოძრავებენ, კანონმდებლობით გათვალისწინებული სანქციები გატარდება.