„საქართველოში გარემოს ჯანმრთელობის დაცვის სისტემის გაძლიერების“ პროექტის ფარგლებში, სოფლის მეურნეობის სამინისტროს ლაბორატორიას ევროპელი კოლეგები ეწვივნენ და ლაბორატორიის შესაძლებლობებს ადგილზე გაეცნენ. მათ დეპარტამენტების უფროსებისგან მათთვის მნიშვნელოვან საკითხებზე ამომწურავი ინფორმაცია მიიღეს.
სოფლის მეურნეობის სამინისტროს ლაბორატორიის პრესსამსახურის ინფორმაციით, საქართველოში გარემოს ჯანმრთელობის დაცვის სისტემის ინსტიტუციური გაძლიერების პროექტი საჯარო სამსახურების დაძმობილების პროგრამის (Twinning) ფარგლებში ხორციელდება. Twinning წარმოადგენს ევროკავშირის ინიციატივას, რომელიც აერთიანებს ევროკავშირის წევრი სახელმწიფოებისა და ბენეფიციარი ქვეყნების ექსპერტულ პოტენციალს, რომლის შედეგადაც ხდება თანამშრომლობის გაღრმავება სხვადასხვა სფეროებში.

უწყების ინფორმაციითვე, პროექტს ევროკავშირის წევრი სახელმწიფოების ეროვნული სამსახურები და მოცემულ სფეროში მათი პარტნიორები (იტალია, გაერთიანებული სამეფო და პოლონეთი) ახორციელებენ.
პროექტის მიზანია, საქართველოში გარემოს ჯანმრთელობის მარეგულირებელი საკანონმდებლო ბაზის გაძლიერება ევროპულ მოთხოვნებთან ჰარმონიზაციის გზით, ასევე, გარემოს ჯანმრთელობის საკითხების მართვის გაუმჯობესება, გრძელვადიანი გარემოსდაცვითი პოლიტიკის უზრუნველყოფა და სექტორებს შორის თანამშრომლობის გაღრმავება. საზოგადოებრივი ჯანმრთელობის დაცვის სფეროში მომუშავე სახელმწიფო უწყებებს შორის ერთ-ერთ მნიშვნელოვან რგოლს წარმოადგენს სოფლის მეურნეობის სამინისტროს ლაბორატორიაც.
უწყების ინფორმაციით, პროექტი ხელს შეუწყობს გარემოს ჯანმრთელობის ეფექტური სისტემის ჩამოყალიბებას და ჯანდაცვის მხრივ არსებული ვითარების გაუმჯობესებას, საქართველოს მოსახლეობის საკეთილდღეოდ.