შსს-ს მესაზღვრემ, არსენ ყარაგვეზაშვილმა ტაილანდური კრივის ტურნირში - "რინგის მეფეები" გაიმარჯვა და ჩემპიონი გახდა. საერთაშორისო ჩემპიონატი ქალაქ ბაქოში, თავისუფალი ორთაბრძოლების ორგანიზაციისა და აზერბაიჯანის ტაილანდური კრივის ფედერაციის ორგანიზებით გაიმართა.
80კგ წონით კატეგორიის ორთაბრძოლაში სასაზღვრო პოლიციის N4 სამმართველოს (დედოფლისწყარო) თანამშრომელი, 2014 წლის მსოფლიო ჩემპიონი კიკბოქსინგში, საქართველოს ტაილანდური კრივისა და კიკბოქსინგის ნაკრების წევრი, ლეიტენანტი არსენ ყარაგვეზაშვილი ასპარეზობდა. პროფესიონალური ქამრის ტიტულის მოსაპოვებლად მისი მოწინააღმდეგე აზერბაიჯანელი, მრავალი ტიტულის მფლობელი ტურალ ბაირამოვი იყო.
ქართველმა მებრძოლმა ტექნიკური ნოკაუტით დაამარცხა მეტოქე და პროფესიონალურ ქამარს დაეუფლა.
გამარჯვება მოიპოვა შსს-ს ქვემო ქართლის პოლიციის დეპარტამენტის რუსთავის საქალაქო სამმართველოს თანამშრომელმა ნოდარ ცხოვრებაძემაც. მან 75კგ წონით კატეგორიაში მონაწილეობა მიიღო და გადამწყვეტ ბრძოლაში, ირანელი მეტოქის დამარცხებით, ჩემპიონის ქამარი მოიპოვა.