პეკინის ქუჩაზე სარეაბილიტაციო სამუშაოები  დასრულებულია.
როგორც თბილისი მერმა დავით ნარმანიამ განაცხადა, პეკინის ქუჩაზე უახლოეს დღეებში ტროტუარების მოპირკეთება დასრულდება, რის შემდეგაც ქუჩა როგორც ავტოტრანსპორტისთვის, ასევე ფეხით მოსიარულეთათვის სრულად გაიხსნება.
"მიუხედავად ჩვენი ოპონენტების სკეპტიკური განწყობისა, ჩვენ ამ პროექტის განხორციელება გადავწყვიტეთ და ისევე როგორც ჩვენი ყველა სხვა დაპირება, ამასაც საკმაოდ მოკლე დროში შევასრულეთ" - განაცხადა დავით ნარმანიამ.

დედაქალაქის მერმა, მთავრობის სხდომაზე, პეკინის ქუჩაზე ჩატარებული სამუშაოები შეაჯამა და მოსახლეობას გამოჩენილი მოთმინებისა და მხარდაჭერისთვის მადლობა გადაუხადა.

როგორც დავით ნარმანიამ აღნიშნა, მერიის სხვადასხვა სამსახურების, კომპანია "ჯი ვი პი"-სა და "ბლექ სი გრუპის" კოორდინირებული მუშაობის შედეგად, პეკინის ქუჩაზე საკმაოდ სერიოზული სამუშაოები ჩატარდა.

რეაბილიტაციის ფარგლებში, პეკინის ქუჩაზე, ასფალტის ახალი საფარი დაიგო. მიწისქვეშა კომუნიკაციები სრულად გამოიცვალა; წყალსადენის ქსელი, გერმანელი ექსპერტების დახმარებით, ევროპული ტექნოლოგიით მთლიანად განახლდა; ექსპლუატაციაში გაშვებამდე ქსელს ჰიდროტესტირება ჩაუტარდა; შუქნიშნის ყველა ობიექტი გამოიცვალა და შშმ პირებისთვის ადაპტირებული ხმოვანი აპარატურითა და "სიმენსის" უახლესი კონტროლერებით აღიჭურვა.
პეკინი ვაჟა- ფშაველასა და პეკინი-ყაზბეგის გამზირის კვეთებში უსაფრთხოების კუნძულები გაკეთდა, ხოლო, კალანდაძისა და პეკინის ქუჩების კუთხეში გზა გაფართოვდა და 1 საავტომობილო ზოლი დაემატა.
დაპროექტდა ველობილიკი, სადაც ველოსადგომებისთვის 4 ლოკაცია გამოიყო. ტრანსპორტის სამსახურის მიერ, ველობილიკი უზრუნველყოფილი იქნება შესაბამისი ნიშნებითა და მონიშვნებით.
უახლოეს დღეებში ავტობუსების ზოლების "ბასლაინების"მოწყობაც იგეგმება, რის შემდეგაც ავტობუსების გაჩერებებზე ახალი მოსაცდელები დაიდგმება.
ქვეითთა გადასასვლელები ცივი პლასტის მეთოდით დაიხაზება. ორფეროვანი, ან ერთფეროვანი "ზებრები" სპეციალური შუშის ბურთულაკებით დაიფარება, რომლებიც ხელოვნური განათებისას ბზინავს და მაღალ ხილვადობას უზრუნველყოფს.
რაც შეეხება გამწვანების სამუშაოებს, პეკინის ქუჩაზე 100 ქოთანი დაიდგმება, რომლებშიც დეკორატიული ბუჩქები დაირგვება.
პეკინის ქუჩაზე ავტომობილების პარკირების ახალი სქემაც შემუშავებულია. პეკინი-მიცკევიჩის ქუჩების კვეთაში არსებულ სამკუთხედში მიახლოებით 50 ავტომანქანაზე გათვლილი პარკინგი მოეწყობა. პეკინის ქუჩაზე სულ პარკირების 205 ადგილი იქნება.
რაც შეეხება პეკინის ქუჩის გაცალმხრივებას, როგორც დედაქალაქის მერმა მთავრობის სხდომის მიმდინარეობისას აღნიშნა, იმ შემთხვევაში, თუ რაიმე სახის არსებითი დაბრკოლებები არ იქნება, მოძრაობა ცალმხრივი დარჩება.

"პეკინის ქუჩაზე ამ ეტაპზე მოძრაობა იმ რეჟიმში ხორციელდება, რაც პეკინის ქუჩის რეაბილიტაციის დროს გვქონდა. ანუ ცალმხრივი მოძრაობაა ყაზბეგიდან 26 მაისის მოედნის მიმართულებით, ისევე როგორც 26 მაისის მოედნიდან კოსტავას და შემდეგ უკვე შარტავას ქუჩების გავლით არის ცალმხრივი მოძრაობა. იმ შემთხვევაში, თუ რაიმე სახის არსებითი დაბრკოლებები არ იქნება, მოძრაობა ცალმხრივი დარჩება" - განაცხადა დავით ნარმანიამ.